趙彤向富二代 Say No !

台灣女主播趙彤因躋身富二代社交圈成名，先後與兩位鑽石級公子傳緋聞，難免被認定是拜金族，樣靚身材正的她揚言要洗脫愛財標籤，並語帶「仇富」地說：「如果要為金錢低頭，我唔得囉！」

金錢與女人，對富二代來說是唾手可得，眼見不少女星飛上枝頭變鳳凰，難免令人聯想到娛樂圈是嫁入豪門的跳板。由台灣來港發展六年的趙彤（Yedda），雖然事業不算突出，但自數年前傳與鄭裕彤孫兒鄭志恒撻着，去年再被指越級挑戰跳水公主郭晶晶，與霍啟剛傳緋聞，間接令她人氣急升！不過，Yedda直斥報道失實，更一度打算返回台灣重新開始：「其實我個人幾執着，經理人都勸我當睇唔到，但原來我好介意！雖然我冇承認過同任何人拍拖，但有啲讀者信以為真，亦聽過一啲令我難受嘅說話！我係一個普通女仔，第時都要嫁人，雖然我依家冇拍拖，但呢啲新聞會損害我未來夫家嘅面子！總之我冇做過，亦唔係第三者！」

搵男友唔講金

畢竟曾與富二代傳出兩次緋聞，難免令人懷疑Yedda是拜金女，她澄清跟霍啟剛的關係只是「兄妹」，雖然啟剛對她疼愛有加，但並非情人。不過，她對緋聞舊愛鄭志恒則不欲多談，像被點中死穴般，並語帶「仇富」地剖白擇偶條件：「我冇講過對象一定要好有錢同富豪第二代，我六年嚟工作冇停過，經濟上唔需要靠其他人！我認為識朋友唔係在乎對方有冇錢，亦冇利用任何方式去識呢啲人，一切都係緣分！」她又打了一個比喻，假如你要求上帝給你100萬元，但上帝卻認為只需給你20萬元，即使你用任何手段多賺80萬元，最終亦可能一無所有：「其實富二代喺我心目中都係普通人一個，我冇同佢哋做生意，冇金錢利益，只係純粹友誼，所以相處得好舒服！」

在愛情上力求完美的Yedda透露，另一半試過因壓力太大而分手：「我係一個麻煩女友！永遠放愛情喺第一位，事業第二位，但我對男友要求極高，我要佢好似爸爸咁照顧我，哥哥咁同我玩，又要似一本字典咁乜都識，所以嚇怕咗人哋！不過，我唔使男友用錢照顧，我有能力，如果只靠人哋養，已經等於低咗一級！對唔住！我唔會為錢低頭，唔得囉！我唔係一隻小綿羊！」

家族顯赫有名

除了與富二代的緋聞情史外，其實Yedda的家族亦來頭不小，祖先趙一山是清朝狀元，亦是台灣首位創校的大人物。父母是生意人，家中有一哥一姊，她直言從小家教極嚴：「細個媽咪唔畀我睇漫畫同小說，同學仔媽咪送水果畀我食又唔可以要，話唔可以收人哋禮物，但大個咗就明白媽咪只係唔想我哋貪心！」Yedda感激父母從小給予良好教育，又讓她學習芭蕾舞達12年之久：「我以前想做舞蹈員，但因為拉傷隻腳而跳唔到舞，依家都覺得可惜！」

接受閃電結婚

工作方面，Yedda至今曾參演五套王晶的電影，經常中港兩邊走的她，大部分時間留在內地做女主播。近年篤信風水命理的她，不時邀請玄學家上節目，令她愈來愈迷信：「幾個玄學家都話我出年會結婚，我都希望承佢哋貴言，因為唔想再糾纏喺啲新聞度！（老公有冇錢？）佢哋話好叻o架！（閃電結婚？）都唔閃電啦！大S都咁快！緣分到嘅時候自己會Feel到！」

文：呂曉風