舊愛林韋辰搭上友台小花
舊愛呂晶晶與盛品儒打得火熱，身為前男友的林韋辰原來亦一早知道兩人拍拖多月，他說：「我都知晶晶同盛生拍拖幾個月，我當然祝福佢哋啦！大家雖然分咗手，但仍想對方開心嘅！」
阿辰與晶晶分手後，感情各自精彩，阿辰最近亦有着落，與前香港網球代表隊成員李思雅「撻着」！李思雅現為無綫藝員，主持多個體育節目，她亦承認與阿辰現正蜜運中：「我哋拍咗幾個月拖，喺藝人高爾夫球會認識，阿辰係球會副會長，佢好照顧我。（大你好多？）我唔介意，反之佢教識我好多嘢，我哋最近已見過家長，亦去過對方屋企拜年！」
