林峯舞獅頭甩手玩謝徐子珊

去年人氣、財氣兼收的林峯，負面新聞從未間斷，但他誓要在新一年再闖高峰。他還率領新加入其經理人公司的吳卓羲及徐子珊，祝大家兔年行大運！

無綫小生花旦林峯、吳卓羲及徐子珊因年紀相若，分外投契，兩子未有將子珊當作女兒身，更經常夾計整蠱女方，令子珊只懂傻笑！拍攝當天，阿峯對獅頭非常有興趣，更一臉帥氣地高舉獅頭及擺甫士拍照，子珊則作狀打鼓，默契十足。但因獅頭具一定重量，阿峯愈拿愈低，最後索性將獅頭擱在子珊的膊頭上，令伊人呱呱叫！卓羲即拿起巨型揮春擺騎呢甫士拍照。

新一年來臨，阿峯希望兔年能一切順利，問到是否因去年是非纏身而有感而發？他說：「都唔係，喺呢個圈都超過10年啦！明白唔會全世界人都鍾意你，我知道唯一可以做嘅係做好自己，咁先對得住賞識自己嘅人，其他嘢我控制唔到。」

吳卓羲唔急拍拖

卓羲則希望今年繼續進軍內地市場，對於被取笑30出頭仍不談戀愛，他說：「阿媽都冇催，我唔會一見鍾情，要相處耐啲。」而單身的子珊笑言希望今年能重返樂壇，問到與兩位師兄合作無間，感情有否提升？她笑說：「對到嘔啦！呢排做阿峯個唱Tour，我哋三個相處得好融洽，好似三兄弟咁！」