祖藍聞婚即落閘嗌分手

拍拖年多的王祖藍與李亞男，首次以情侶檔演出賀年節目，公然「耍花槍」！被問婚期時祖藍竟指今年願望可能是「分手」，搞到李亞男即場「嬲」！

自去年底公開「藍男戀」後，王祖藍與李亞男經常隔空傳情晒恩愛。兩人昨日以情侶檔演出無綫賀年節目《富貴金兔賀新春》，獲公司重視演出兩個環節。李亞男甫開場與宋熙年及張嘉兒等化身兔女郎，又唱又跳拱照王祖藍出場。

其後，反串了得的祖藍裝胸上陣，與鍾嘉欣及同樣反串的女友演趣劇《義海開心過新年》，公開打情罵俏！演「九姑娘」的祖藍問黐鬚扮「劉醒」的李亞男︰「做乜高咗咁多？」她即抵死地說︰「我不嬲都高過你，你出嚟踩場就賺騷，人哋會話我偏心o架！」逗得全場大笑。他倆還情侶檔派利是，連利是封都襯到絕，問到派利是有否夫妻感覺？祖藍語帶激動︰「絕對唔係！不嬲都有派，依家仲開心，兩個都仲有得拿。」問到何時結婚派利是，祖藍即用拖字訣︰「等我哋收多幾年先啦！」

李亞男認嬲

提到拜年，未有結婚打算的祖藍笑言女友的家人住得遠，未有機會往拜年︰「我一返嚟就去見六叔拜年，佢重要過我父母。」李亞男被問到何時向「未來奶奶」拜年？她即反應甚大地說︰「我仲叫佢Auntieo架！」祖藍在旁搶答，還語出驚人︰「冇咁早，亦唔肯定係佢，話唔定我哋今年願望係分手呢！」未知是否被男友的幽默感染，李亞男隨即撒嬌扮嬲︰「我嬲你！」場內場外不停打情罵俏，甜蜜到爆燈！同場的馬浚偉表示放假到初十，打算往台灣探親，但女友不會同行，還透露被家人催婚。他又表示獲汪明荃讚演技，笑言今年目標是奪視帝。

放假見「外父」

另外，祖藍前晚與林欣彤等錄影《勁歌金曲》，合唱歌曲《I Love Hong Kong》，他說：「背歌詞都背咗2日，又唱唔慣Rap，好緊張！」問到有否拜會「未來外父外母」？他笑說：「佢哋唔喺香港，遲啲搵個假期去探佢哋！」