娜姐兔氣揚眉捧A貨撼Baby

性感女神周秀娜勁捧金元寶向大家拜年，祝各位兔年行大運！如小白兔般勤力的她今年繼續與Angelababy競爭，不但自資力捧「32D」新進o靚模做老闆，更從模界、影壇及商界三面夾擊「升Cup」Baby，兩位女神「好戲」在兔年！

繼Angelababy宣布成為美容界老闆娘後，今年周秀娜亦榮升為商界老闆，親自力捧32位o靚模！去年勁賺逾千萬的娜姐因樓市高企，遲遲未能上車，據知，身為一姐的她已投資七位數字落自己公司GME，正式成為股東，公司今年會展開「32D命運少女」攻勢，力捧32位由內地及日本招募的新進o靚模，不但要有樣有身材，而且個個要被「娜姐」親自過目，挑選嚴謹，難怪初為老闆娘的她如此緊張！對於入股，她未有否認：「一向都想用賺到嘅錢嚟投資，我對公司好有信心。（7位數？）我係瞓身支持。」新一年，她仍想在影壇繼續播種：「今年我安排大部分時間拍戲，檔期排到9月，新年願望係影壇有好反應，唔敢奢望攞獎，可以行紅地氈已經好滿足。」

娜姐不但要在商界力戰Baby，還要在影壇大展拳腳，不過Baby亦不輸蝕，最近積極進攻電影，除與緋聞男友黃曉明奉旨談情拍戲外，前晚她出席為動畫配音的首映禮，她穿上低胸長裙，大晒「升Cup」胸！她表示新年要開工，與曉明在內地拍戲，並坦言新年沒有機會見曉明家人：「我哋都要拍戲，冇咩時間。（佢媽咪嚟探班？）唔知！（見過你家長？）未見過，大家都好忙，安排唔到。」同場的余文樂被問到是否已準備養老婆？他說：「我都想，不過未有對象，嚟緊拍愛情片，個女演員想合作好耐，仲要名花未有主，追到就好喇！」至於曉明昨晚在微博說：「發紅包了！」只見利是封上印着戴黑超的型男，與手持一大疊利是的他猶如餅印一樣！

寸死敵「發水胸」

對於Baby突然「升Cup」，娜姐為力保真材實料的32D，即反擊笑說：「我去完泰國浸吓水個胸都會發脹啲！（會唔會簽似Baby嘅少女做o靚模？）會！內地市場咁大，有都唔出奇。」似乎暗寸現在「Baby樣」通街都係！

另外，娜姐前晚穿性感睡衣錄影亞視《11點後特區》，與A.Lin、盧頌之、Hailey C.及Annie G.四位主持暢談私事。問到會否怕遇到尷尬問題？她說：「預咗！女仔圍埋一齊都係講仔o架啦！一係問佢哋有冇男仔介紹！（想換男朋友？）我都係齋講啫！唔敢做！」由於是深夜節目，談話尺度可能較寬：「應該唔會講性，想啲觀眾睇完個深夜節目就上床瞓覺。（揀性感內衣畀男友睇？）佢都唔識o架啦！我諗喺佢心裏面覺得我着咩都靚嘅！（喺屋企都係着性感睡衣？）喺屋企仲性感，會真空！」