高呂事業線互「吋」阿澤晒臀圓

三套港產賀歲片Sell大堆頭、大卡士，其中呂慧儀及高海寧兩位咪神為「娘家」新片谷事業線；杜汶澤使出最強「股」惑招；吳君如則偏心陳可辛監製的新片，三代同堂舉家谷戲。

曾志偉監製的賀歲片《我愛HK開心萬歲》前晚舉行首映，吳君如、法拉、徐子珊、林峯及鄭欣宜等近百藝員出席，高層梁乃鵬及樂易玲亦有現身，場面熱鬧，而與志偉打對台的黃百鳴則隻身踩場兼與志偉互寸，惹笑非常。至於兩位「咪神」呂慧儀及高海寧則鬥事業線兼鬥氣，前者谷胸澎湃上陣，寸嘴取笑以吊帶低胸紅裙搶鏡的高海寧：「你估一吋長一吋強咩？」而同場穿紅裙配Fur外套的君如被取笑性感度不及後輩，她即笑說：「畀啲生力軍上啦！志偉拍戲時都話畀佢哋兩個（指高、呂）企前啲吸引宅男，我呢啲老少咸宜就企後啲。」

驚見「全相」甩晒嘴

黃百鳴的賀歲片《最強囍事》見對手來勢「胸胸」，奇招派杜汶澤在熊黛林（Lynn）面前「剝光豬」吸客，由於拍攝前Lynn以為劇組開玩笑，根本沒有這場戲，故正式拍攝時，驚見阿澤脫光光的Lynn當場嚇窒，不懂反應兼甩晒對白，只懂大叫大跳。她事後說：「初頭以為佢哋講笑，真係畀佢嚇死我，好在佢前面黐晒膠紙，所以冇睇到啲唔想見嘅嘢，好尷尬。」阿澤卻反讚Lynn：「嗰刻佢好真情流露，效果好好。」

子丹留港陪子女

另外，黃百鳴透露《最》片在內地上映一日票房收逾一千三百萬元人民幣，指志偉的《我》片票房成績不及《最》片一半。而忙新片宣傳的Lynn，為爭取時間與攻城愛犬Cookie見面，早前拍賀年相亦預牠一份。至於另一主角甄子丹，新春期間難得有數日假期，決定留港陪家人，他表示平日甚少時間陪子女：「有時真係好內疚，之前喺屋企出門口，囝囝James即時喊爆，真係好心痛。」太太汪詩詩卻笑言囝囝此舉令她呷醋。