黃婉曼春裝做街訪起晒雞皮

「天氣女神」黃婉曼（Icy）昨日在街頭拍廣告，穿上春裝的她凍到起雞皮。對於被拍下與一名男士「一杯咖啡兩份飲」，Icy澄清對方只是助手，但承認已跟男友分手。

雖然黃婉曼離開TVB，但工作有增無減，昨日她在旺角鬧市拍攝健康產品廣告，穿露臂春裝在街頭做訪問，因天氣寒冷，她凍得起雞皮。

儘管又冷又食風，但她仍死撐，面帶笑容地拿着咪做訪問，難怪她事後笑說：「賺呢啲都係辛苦錢！」

性感冇下次

早前有報道指Icy與一名男士「一杯咖啡兩份飲」，因而傳出新戀情，她澄清對方只是助手：「個男仔係我新助手，好多傳媒都見過，睇完新聞得啖笑。」不過她亦大方承認已跟男友分手，並期待新戀情：「早排大家已經分開咗！依家惟有畀心機工作。（有人追？）OK啦！不過感情嘢都係順其自然好啲！」雖然Icy當日穿一襲鮮綠色背心連身裙，散發青春魅力，但不及早前的紅色Deep V裙有睇頭，問到是否酬勞愈高愈性感？她極速否認：「上次係有啲意外，事後自己都有唔開心，我唔係專登性感，而且今日拍健康產品廣告，只係配合番自己同品牌形象，我諗都冇下次。」