栢芝拒愛古仔搵霆鋒救駕

張栢芝出席電影《最強囍事》首映時一展幽默本色，她透露戲中與古天樂相愛但不能愛後，即被古仔糾正指二人終成眷屬，她即表示只知道已嫁給謝霆鋒，贏得全場掌聲！

早前拍戲受傷的栢芝，前晚首次在港露面出席黃百鳴賀歲片《最強囍事》首映，她穿上粉紅色露肩娃娃裙亮相，面部傷勢已無大礙。雖然她表明不接受訪問，但在台上透露戲中與古天樂相愛但不能愛後，古仔即更正她：「我哋有相愛o架喎！你係咪唔記得咗呀？有場戲我嚟搶婚o架喎！」栢芝立即急轉彎說：「對唔住！我真係唔記得咗！我只知嫁咗畀謝霆鋒。」全場報以掌聲！古仔大讚栢芝比過往幽默：「你唔係少女喇！你係媽咪喇！」

而同場的甄子丹表示曾在電影露股，若票房理想不知還有甚麼可露，而劉嘉玲則笑言可以露番兩手功夫：「我喺屋都係人肉木樁，成日同人練功夫。」古仔亦笑言可以「露啲嘢」。對於有指主演的《讓子彈飛》成為內地史上最高票房的國產片，成績較丈夫梁朝偉優勝，嘉玲說：「拍馬都追唔上，佢地位好崇高，一世都追唔到，下世再嚟過啦！」

熊黛林唔急結婚

至於熊黛林則否認與郭富城訂婚的傳聞：「梗係唔係真！冇呢件事發生。（有計劃？）冇計劃過呢兩年內，想拍多啲戲。（一早結咗？）依家我絕對單身。」對於郭富城就傳聞表態暫無意結婚，問到有否感到失望？她說：「佢又冇講我個名，答案唔同，如果我對號入座我都唔答，如果講感情事我唔講。（希望得到一個名分？）係女仔都想。（催吓佢？）催邊個？（郭富城）冇啦！（主動出擊？）唔會嘅，都唔急。」

志偉踩場撩裸泳

首映禮上，另一部賀歲片《我愛HK開心萬歲》主腦曾志偉率領高海寧及呂慧儀等人踩場，志偉說：「我都係帶啲細嘅嚟學嘢啫！」他揚言若兩部電影票房均過四千萬元，會以裸泳或裸跑謝票：「我畀黃百鳴揀先，如果佢唔想露得多嘅，可以揀裸泳，都係上水、落水露到啫！」記者提議二人一同裸泳，志偉說：「唔得！我怕畀魚啄，我個面比積比佢大好多喎！」