美娜為變黑天鵝瘦到變咕嚕

妮妲莉寶文憑《黑天鵝》封《金球獎》影后，該片第二女主角美娜古妮絲同樣備受注目，早前接受訪問時除了分享喜怒哀樂，自爆為變黑天鵝而減肥變咕嚕外，更笑談與妮妲莉的床戲！

記：記者 美：美娜古妮絲

記：聽講籌備拍《黑》片嘅過程好辛苦，到底係咪真o架？

美：事先我對芭蕾舞一竅不通，開拍前我哋受訓3個月，之後拍攝時繼續，係1星期7日，每日4至5個鐘地獄式訓練，係我一生最密集、最艱苦嘅操練！期間我體重跌至95磅，瘦咗20磅，好似咕嚕（《魔戒》虛構角色）一樣咁瘦！

記：拍攝時節食又受訓，拍完係咪擦餐勁？

美：當然有！嗰5個月激減嘅20磅，我唔使幾粒鐘就增番！記得拍完所有跳舞戲嗰晚，我即刻食咗一大碗芝士通粉！嗰時我一下子由健康餐單回復番以前差爆嘅飲食習慣，腸胃有啲唔適應！完成所有拍攝後，我喺機場已忍唔住食咗個中式快餐，落機又去快餐店食薯條同雪糕黑牛！

導演令人釋懷

記：同妮妲莉合作成點？

美：我覺得佢好易相處，好好彩我哋拍《黑》片前已經係朋友，佢唔止係好演員，鏡頭後都係好人！

記：你哋拍床戲係咪好尷尬？

美：我覺得拍任何床戲，無論對手係男定女都好，都會有一定程度嘅不自然囉！不過，好彩我哋係朋友，拍攝前唔使討論太多，順其自然就完成咗嗰場戲喇！

記：之前有冇拍過床上戲？

美：拍過獨立電影《After Sex》，素兒莎丹娜飾演我女友，我哋冇拍床戲，只有一場事後戲份，咁應該唔算啩？

記：點解為《黑》片獻出第一次呢？

美：我一直都好信任導演Darren Aronofsky。拍床戲總會令人有所顧忌，不過佢令我感覺信得過，令我安心去發揮！

《奧斯卡》太沉重

記：坊間對你同妮妲莉都有好高評價，甚至問鼎《奧斯卡》，係咪好大壓力？

美：《奧斯卡》令我好唔自在！我只求觀眾喜歡電影，任何頒獎禮我都冇諗太多，亦都唔想講太多！不過，咁當然係一份榮幸，我好感恩，不過我希望外界會欣賞呢部電影，其他嘢對我太陌生喇！

記：你認為自己係黑天鵝定白天鵝？

美：兩者都有！我相信每個人心中都有隻黑天鵝，視乎你幾時畀佢釋放出嚟！不過，我覺得我唔似黑天鵝咁有冒險精神，有時候都想大膽啲！