志雲解畫：證明好獨立

陳國強收購無綫後接受部分傳媒訪問，無綫竟然冇份！無綫總經理陳志雲昨日表示乃好事，證明獨立，不會有特權！至於曾志偉亦力撐好友陳國強不是初哥，但朋友之間會給予意見。

陳國強購入無綫後，日前接受傳媒訪問，但無綫竟然冇份！陳志雲昨日返電視廣播城接受訪問時說：「咁樣就可以證明係好獨立啦！唔會有特權，都係一件好事！（今次賣股係咪包括清水灣地皮？）我唔清楚，不過陳生（陳國強）點同記者講就應該依照佢意思！」至於無綫執行董事及集團總經理李寶安，被問到陳國強有否與高層傾談未來路向？他說：「要講嘅嘢其實已經公布晒，暫時冇嘢發表！」

亞視：一直招兵買馬

另一邊廂，亞視昨日舉行春節晚會拜神活動，藝員陳啟泰、朱慧珊、台模林嘉綺及蔡淑臻出席，高層葉家寶對無綫易主一事表示，不會多講別人的事，而亞視則以香港及大中華為主，不單無綫是競爭對手，所有珠三角電視台均是對手。問到可有相應對策？他說：「自從我哋新股權入主後，都一直招兵買馬，增加唔少員工，如果有台前幕後人才，亞視大門都會為佢哋而開！」他坦言一直有不少中層的無綫員工過檔，至於藝人方面？他說：「香港電視台唔多，就算過檔都唔係乜嘢特別事，不過唔會亂簽人返嚟又冇嘢畀人做！」至於陳啟泰及朱慧珊將擔任晚會司儀，不過陳啟泰表示與有線還有約，暫時不打算返亞視，朱慧珊則坦言不排除返娘家。

志偉：應該變動不大

另一方面，曾志偉昨日接受查小欣主持的電台節目訪問，指好友陳國強絕不是初哥：「佢以前係收費電視股東，並唔係單單一個利益投資者。（事前有冇通知你？）佢喺新聞播出15分鐘前打畀我，朋友之間會畀意見！佢同方逸華係老拍檔，默契多，入嚟應該變動不大！」另一方面，他表示完成其父曾啟榮喪禮後，心情已OK，並指亡父靈位準備安放於台灣松山寺：「下月26號會喺香港舉行惜別會。」