娜姐反寸楊梓瑤遲早死

周秀娜早前被傳不和的楊梓瑤暗寸年紀大，她昨日偕男友行騷齊聲反擊：「其實佢都會經歷，遲早都會老同死。」繼續隔空互寸。

曾合作拍電影的周秀娜（Chrissie）與「浸大E神」楊梓瑤（Carol）屢傳不和，昨日Chrissie與模特兒男友Avis首度以情侶檔姿態為PONY 2011全新系列行騷。她自爆酬勞十分可觀，足夠享受一個泰國豪華團，寓拍拖於工作，可謂一舉兩得！

當自己係後輩

提到日前被Carol在公開場合上指是前輩，有暗寸年紀老之嫌，Chrissie回應時卻未見動怒，反而自認「等死」，新春前認真大吉利是！她說：「多謝各位！我日日都當自己係後輩，冇諗過出道兩年已經係前輩！人總要經歷生老病死，佢口中嘅我已經經歷咗老，惟有等死啦！哈哈！講笑啫！其實佢都會經歷，遲早都會老同死，希望佢唔好咁快老同死，講笑啫！希望新一年大家長做長有。」充滿弦外之音！

唔介意被抽水

問到Carol公開指大家並非真正朋友，Chrissie即急忙澄清，形容大家合作時有傾有講。對於經常被對方「抽水」作宣傳，Chrissie自言仍「生勾勾」：「佢提我好正常，我冇咁易死。」默默在旁的Avis聞言亦和應：「係，佢（Chrissie）冇咁易死。」實行「婦唱夫隨」。

至於，是次品牌與雷頌德主理的COOLDAY,SIR合作，昨日他亦有出席。提到好友陳慧琳人工受孕懷龍鳳胎，本身育有三子的他大讚厲害，自言同樣恨生女。不過，他認為養育三名兒子亦有好處，可以慳回衣服及玩具，循環再用。