江若琳趁兔年檸檬質師弟

江若琳近年事業有成，可惜感情零分，難怪她希望兔年會有桃花降臨！雖然師弟徐正曦高大英俊，不過卻不是伊人杯茶！

回顧2010年，江若琳曾開個唱及拍劇，工作多多，她希望新一年可衝出香港，向大中華市場作多元化發展。她坦言珍惜機會，甚至農曆新年間要在北京工作，她亦沒有半句怨言：「相信家人會明白，有得必有失！」

向來埋頭苦幹的江若琳，感情生活仍一片空白，畢竟只是個20出頭的女生，自然渴望戀愛：「多啲桃花好呀！我每年都會圍住桃花轉圈，人哋話轉3個圈，我就轉足12個，不過都係冇嚟過！」她大讚師弟徐正曦靚仔，不過並非她那杯茶：「靚仔令人缺乏安全感，唔會考慮！」

獨子怕被催婚

慘食檸檬的徐正曦笑言，師姐不認識真正的他：「我唔會出去玩，平時喺屋企玩電腦，畀人笑似宅男！（想拍拖？）我都想要桃花！拍感情戲可以幫助投入，不過我成日唔喺香港，又怕會忽略女友，好矛盾！」農曆新年，他會返上海與家人歡度，但又擔心被追問感情：「因為我係獨仔，唔知家人會唔會催婚呢！」