G.E.M.驗乾鮑：仲會唔會郁？

鄧紫棋（G.E.M.）早前首次到海味店為家人準備年貨，可謂樣樣新奇，見識四頭乾鮑時更問：「仲會唔會郁o架？」結果全場爆笑！

文：高美　攝：黎志輝

年三十晚返廣州演出春晚的G.E.M.，早前特別往海味店辦年貨，準備提前與家人食團年飯。原來今次是她首次辦年貨，以往一直由家中的大廚父親負責。G.E.M.指父親廚藝了得，問到為何未有學幾招傍身而落得「地獄廚神」之名，她笑說：「我哋鄧家嘅女仔都唔使入廚，我入廚房攞嘢食就有嘅。」她還自爆最叻是煎蛋及煮即食麵。

聞花膠王開眼界

海味店內有各種賀年貨品，甫入店的G.E.M.即一手攞起大盒冬菇，原來她最愛吃菇。相反，她面對魚翅則耍手擰頭，希望為環保出力。其後，當G.E.M.看到飾櫃內兩個圓柱狀的物體竟標價56萬元，嚇得兩眼瞪大！店舖老闆娘表示該對是花膠王，還拿出來讓她開眼界。難得見識名貴花膠，但她聞兩聞後竟說：「冇味呀！我覺得啲花膠外形好似水壺，上面開兩個窿，放兩支飲管咪得囉！（拍咗拖咩都預埋緋聞男友林宥嘉？）係每邊兩支飲管，係四支，啱啱係我一家人咋！」其後，老闆娘拿出四頭乾鮑讓她見識，G.E.M.竟抵死笑問：「仲會唔會郁o架？」隨即笑爆全場。

提到新年，G.E.M.希望有時間返上海向婆婆拜年，但因年三十晚仍要工作，所以至今仍不敢訂機票。問到可會期望老闆給大利是？她說：「希望老闆識做啦！上年都豆咗六千幾蚊利是，希望今年破紀錄！」

場地：好東西