譚俊彥催李曼筠盡快嫁人

狄龍兒子譚俊彥、李曼筠（Maggie）、冼色麗及王仲欣相約提早團拜，大家不約而同穿到紅噹噹，非常喜氣！想不到卻變成「逼婚大會」，大家催促大師兄譚俊彥快些結婚，他則反叫Maggie盡快嫁人。

文：冰奇　攝：黎志輝

譚俊彥與師妹李曼筠、冼色麗（Bonnie）及王仲欣（Kara）在新年前相約團拜，互相祝賀大家新一年行大運。四人起哄討論誰會先派利是？Bonnie及Kara即反應甚快，指着譚俊彥，她說：「師兄都未派，點輪到我哋呀？」譚俊彥悠然自得地說：「未結婚都派得o架喎！（幾時結？）依家事業為重，我同女友都忙，未有咁快！」然後則向Maggie示意，他笑說：「可能係啲後生女唔聲唔聲咁派利是先呢！」Maggie聞言即大嘆「千金易得，真愛難求」，四人立即又雞啄唔斷發表「偉論」，場面熱鬧！

新年買鞋唔畀阿媽知

談到新年，譚俊彥最難忘是婆婆於生前均會煮一大鍋雞蛋角，讓他一試難忘：「因為公公鍾意食，所以我依家都會煮，想慢慢摸索番個味道整畀佢食！」Bonnie最難忘與家人到外地旅遊，希望今年亦可成行：「傳統話喺新年期間唔可以買鞋o架嘛！但我都有試過靜靜雞買咗，唔話畀媽咪知，哈！」

「鬼妹仔」的Kara表示未試過在內地過年，幸好今年能回杭州鄉下向祖父母拜年：「到時仲可以三代同堂，真係好期待！」而Maggie則表示每逢新年都會把屋企布置得紅噹噹：「細個嗰陣媽咪會畀我通屋貼揮春同埋掛燈籠，任我發揮創意o架！」