梁漢文做一哥：分咗50億

被封做金牌大風「一哥」的梁漢文，從新老闆口中得知公司準備了150億元巨額投資，剛續約的他身價提升，還開玩笑說：「我分咗50億！」

農曆新年將至，今年梁漢文（Edmond）可以過肥年，因為剛與公司動筆續約的他，新約下月正式生效，他開心地說：「新年幾高興o架！好有特別意義，係新嘅開始。」年初新老闆龐維仁上場時公布連串大計，透露準備了150億元彈藥投資，記者打趣笑問Edmond分到多少？他即笑說：「50億！剩咗嗰啲其他人分。」

論資歷、實力，Edmond獲封做金牌大風「一哥」當之無愧，他聞言扮得戚地說：「係呀！我係喎！其實好多人成日整鬼我，話咁叫我係想睇我個尷尬樣，咁我咪改變態度，認咗佢囉，哈哈！」其後認真地稱對「一哥」稱號不敢當，但承認憑過往的成績，續約時身價確實有所提升：「公司好有誠意，自動波識做加咗畀我，我又為自己爭取吓，今次份約嘅條件係咁多年來最好嘅一次。」

兄弟班巡唱最爽

去年Edmond忙於與BIG FOUR做世界巡迴演唱會，他形容是開心的一年，既可到處旅遊、又可搵錢，更重要的是與張衞健、許志安及蘇永康聚首一堂：「好難得，好珍惜，大家嘅友情都昇華咗！」由於過去一年飛來飛去，他坦言懶得跟太太「造人」：「舊年係懶啲，成日唔喺香港，如果老婆有咗都幾頭痕。今年會努力啲，係咪生兔B就睇天啦！或者龍B都好，幾夾我。」