中巴失足墮凡間甩拖走寶

崔建邦舊愛鄺敏慧早前自爆與「生意男」拍拖，更晒命表示幸福到「升上天堂」，怎料甜蜜短短3個月便極速分手，要過一個孤單情人節！

年僅21歲的鄺敏慧（中巴）事業愈來愈順利，但情路上卻連番碰釘！去年11月，她自爆與年長11歲的圈外男友Evan拍拖，正當外界以為她覓得「筍盤」之際，她竟在情人節前夕甩拖，回復單身！據知Evan事業心重，不時穿梭中、港兩地打理生意，與中巴的拍拖時間少之又少，經過一輪冷戰，二人終和平分手。

處於療傷期的中巴昨日表示心情已慢慢平復，問到分手是否因對方太忙，她說：「係呀！佢做生意，仲忙過我，一個星期返得香港一日、半日，但都可能唔得閒，基本上我哋係唔見。當時我哋名義上係男女朋友，但佢喺內地發生咩事，我根本唔知，我喺香港發生咩事，佢亦唔知，同埋大家都Feel到唔係幾夾，所以話唔好一齊。」

寄情工作療傷

中巴強調分手不涉第三者，並大讚Evan是好男仔，問到下一個男友是否要多點時間陪她，她說：「真係要有少少時間陪我，因為有時我做嘢或者喺屋企有壓力，都想搵個人傾吓偈同嗲吓，但我暫時唔想拍拖住。（情人節冇人陪？）預咗啦！我依家專心工作，拍拖順其自然。」