老友變老細阿叻嗌好

六叔將無綫股權賣給以「殼王」陳國強為首的財團，藝員都以不變應萬變！

李亞男：「唔太清楚。（你係咪早已認識陳國強？）未見過！有機會想見吓！（提議加人工？）唔需要反映啦！我係滿足嘅員工，希望公司繼續用個心去做節目！」

陳國強好友陳百祥（阿叻）：「我都係今日睇報紙先知，佢之前冇露口風，希望公司會愈嚟愈好啦！（打去同佢傾吓生意經？）唔需要，佢自己都咁叻，識o架啦！我做番藝員做嘅嘢。（好似黎耀祥咁想加人工？）我唔需要，我係無綫唯一一個十五年冇加人工嘅藝人。（點解？）因為人工最貴囉！係何麗全講o架咋！」

楊思琦：「都係睇新聞先知，話公司高層都冇變動。」

葉翠翠：「我哋做演員都係做番本分，冇乜影響。（對未來嘅信心？）唔想太多，做好自己嘢，最近好忙。」

鄭欣宜：「我係飲無綫嘅奶大，呢個消息好突然，只希望公司將來愈做愈好，我哋藝人最緊要做好演藝工作。」

徐子珊：「對股權嘅嘢唔太了解，最緊要六叔、六嬸開心同身體健康，公司愈做愈好，我會繼續做好本分，拍好劇畀觀眾睇。」

洪天明：「我識殼王，佢個人好靜，自己唔抱太大期望，唔通只係捧我咩！希望每個人都有機會，殼王可以帶動香港嘅娛樂事業。」

岳　華：「內幕係點我唔知，不過六叔已經百幾歲，為演藝事業盡晒力，係好難得！」

謝雪心：「唔擔心會有變動，就算有變動都會係好嘅方面。」