Kary貼身肉衣透視Body

將於本月30日首踏紅館舉行演唱會的吳雨霏最近積極排舞，她自爆將為歌迷帶來性感的高難度舞步，並以貼身舞衣將Fit爆身形3D呈現舞台！

吳雨霏（Kary）昨日為紅館演唱會排舞，她透露在舞步中加入大量高難度動作：「初初冇諗住跳咁多，點知愈排愈多！試過排練抬起我嗰Part時撞到天花板盞燈，差啲起瘤！仲有扭親同屈到，搵命博o架！」即場表演跳舞歌曲《Control》的她，除與Dancer貼身勁舞外，還做出不少撩人動作，問到會否性感上陣，她說：「頭先排嗰隻舞會着住一件貼身透視嘅Body Suit，灰肉色嘅。（性感？）OK啦！都擔心好貼。（怕現形？）都係o架！今次會換7至8套衫。（最性感呢？）頭先講嗰件好貼身，睇到就明o架喇！」

被雪藏得啖笑

有指因不聽話而被公司打入冷宮，Kary說：「好搞笑！我冇乜嘢，但公司就好緊張，老闆龐維仁仲親自打電話畀我，怕報道影響我心情。（話你扭計？）要扭都10年前扭咗啦！我應該係最唔反叛嗰個。」她還透露龐維仁對其個唱相當緊張：「佢要去歐洲開會，但都飛返嚟睇我個騷！」