嘉欣臨盆晒肚Fit爆吸客

盛傳初六剖腹分娩的李嘉欣昨日在微博公開首張大肚寫真，與佗孖B的陳慧琳同以BB健康為先，從未節食，但身形同樣Fit爆 ！

李嘉欣盛傳於年初六（2月8日）剖腹分娩，臨盆在即的她身材依然勁弗，不少友人在微博大讚長肚不長肉，她表示常對鏡子說自己不胖，只是有點水腫，惟她一直僅上載大頭照，對於曾揚言有意拍大肚寫真的她，可謂有聲冇畫。

心境要開朗

嘉欣昨日終在騰訊微博以「愛的期待」為題，公開首張大肚寫真，穿上粉色背心紗裙的她無懼中招冷病，坐在地板上拍攝，摸肚微笑的她一臉幸福。她不時在微博與網友分享育嬰心得：「唔係講肥瘦嘅時候，最緊要母子健康，之後再減啦！」話雖如此，但相中所見，她手臂依然纖幼，亦未有如一般孕婦般貪方便剪短秀髮，名副其實是個靚靚孕婦。問到經理人陳善之，嘉欣有何Keep Fit心得？他說：「冇營養師同餐單，飲食以清淡為主，有時佢會自己煮食，最緊要保持心境開朗，有啲廣告客唔講都唔知佢大肚。（請佢母子檔拍廣告？）一路有人問緊，接唔接要睇嘉欣意願，但據我覺得佢唔係咁想，唔想BB受滋擾。（佢心情點？）好Relax，反而佢媽咪仲緊張。（初六剖腹分娩？）唔知。」

嘉欣保養得宜，大肚時仍獲廣告商力邀拍廣告，近日宣布佗孖B的陳慧琳（Kelly）同樣成為廣告商搶手貨，貪她身材依然弗到漏。Kelly承認被廣告商睇中，一家三口曾被邀以滿意價拍廣告，但她有錢也不賺：「未去到傾價錢已經推咗，因為老公唔係圈中人，BB出鏡冇所謂，但仲細，喺影樓周圍走，捉唔住。」

日日做瑜伽

問到佗孖B的Keep Fit心得？Kelly說：「一切聽醫生建議，食鈣片，有助BB發展，食三文魚，飲鈣奶同豬膶水，冇特別進補、食花膠，注意食物有幾多營養價值。（唔怕肥？）唔怕，重要係BB嘅健康，有足夠營養去成長，唔會特別請營養師，日日喺屋企做瑜伽。」