官恩娜拒陪男友鴛鴦浴

官恩娜一直是環保分子，但昨日被問到會否與男友鴛鴦浴節省用水時，她卻害羞地說：「都係各自沖花灑浴啦！」並強調需要私人空間，暫時不會結婚。

設計師何志恩、丘雪祺、何國鉦與官恩娜（Ella）一同出席《衣酷適再生時尚設計》發布會。Ella表示很開心能夠成為活動大使：「我哋做藝人，好多衫只着過一、兩次就唔可以再着，好唔環保！我試過一日裏面要換五、六套衫，真係換衫都換到頭暈！」她透露早前清理衣櫃，把逾五百件衫轉送親友，絕不浪費：「香港人每日所丟嘅衫，可以埋滿一個籃球場！呢個數目真係好驚人！但依家可以將啲衫改造，成為獨一無二嘅衫，好有意義。」

暫不考慮結婚

另外，她笑言一直支持環保，平日少用膠袋及節省用電。問到會否效黎明及樂基兒沖鴛鴦浴節省用水？她說：「我一個人住，邊度搵人同我鴛鴦浴呀？（男朋友？）我諗都係各自沖花灑浴啦！環保係好事，不過佢哋結咗婚，唔同嘅。」

記者追問她何時結婚？Ella即表示需要私人空間，暫時不考慮。至於會否半同居？她說：「暫時未可以接受一齊住，一齊住嘅話，對方接受唔到我嘅生活方式，好似半夜練歌咁，同埋依家我學緊作曲，有時可能深夜起身彈結他。」她又透露農曆新年有兩日假期：「會同屋企人一齊食飯同睇煙花。（有冇約男友？）未約到佢。」