周柏豪望超蓮開心過年

賭王何鴻燊爭產風波成為城中熱話，與三太陳婉珍兩位女兒何超雲及何超蓮先後傳緋聞的周柏豪，希望好友一家和睦過新年，有機會成為未來千億女婿的他坦言，對管理賭業冇興趣：「我會計好差！」

周柏豪、鄭融、HotCha和Square等昨日出席迎新春活動，柏豪被問到緋聞女友超雲及超蓮家中的爭產是非，他說：「睇報紙先知。（打畀佢哋問？）吓？講呢件事？唔會啦！係人哋家事同私事，旁觀者唔應該加把嘴，都冇聯絡，相信都係一件煩事，唔想騷擾佢哋，睇完覺得好深，好複雜，唔明講緊咩。」

「我會計好差」

柏豪表示無論任何一家人都應該一團和氣，望兩位好友能開心過新年。他坦言家族大必有複雜事情，但深信只屬誤會。至於將來會否避揀富二代做老婆？柏豪說：「冇得避，第日話你知，唔係考慮原因，係睇同個人夾唔夾。」

問到是否撐三太？柏豪說：「唔關我事。（你係何家淑女緋聞男友？）呢啲娛樂嘢啫！（未來千億女婿喎？）緋聞嚟啫！（對賭業有冇興趣？）冇興趣，愈講愈深，我係歌手，係佢哋身邊一個朋友，唔係姓何，我姓周，我會計好差！（見過三太？）我同佢哋都係見過幾次，唔係大家想像咁。（被捲入何家新聞，會否受困擾？）呢個係我工作，但都唔想成日將個重點放咗喺呢度，講唔到想講關於工作嘅嘢。」對於「未來澳博女婿」新稱號，他則不願置評。

另外，鄭融透露今年選蘭花作年花，感情事一切隨緣：「唔會刻意講感情事。（公司施壓？）公司畀好大自由，撞到會認，都係自然嘅事。」