蔡卓妍捱過難關

以「連環爆」來形容蔡卓妍（阿Sa）去年的感情生活，絕不為過。阿Sa先被爆已婚，再爆出離婚，然後又與年輕三載的師弟陳偉霆爆出「陳蔡戀」，哄動全城。由於過程峰迴路轉兼引人入勝，而且問號處處，牽連人物甚廣，順理成章佔據各大報章雜誌頭條，甚至「夠料」開一部戲。

人生寶貴一課

阿Sa表示去年經歷人生其中一個最大考驗，走了一段最難行的路：「其實好多嘢睇你點睇，無可否認發生好多事嘅時候，個人係好脆弱，同埋諗好多嘢，會唔開心，雖然係大難關，但慶幸捱過咗！（係咪先苦後甜？）又唔可以咁講，都係上咗人生寶貴一堂，令我對好多嘢有改變，依家個人Easy好多，個人冇咁執着，如果係執着，可能係執着工作Quality（質素），其他嘢都係浮雲，對於朋友、感情同家人，全部都係新睇法。」

認清敵友真偽

自從爆出「陳蔡戀」後，外界有很多不同聲音，有人誠心送上祝福，但亦有人不看好戀情，甚至作出惡意批評，幸而阿Sa豁然面對，而且她的接受能力提高不少：「依家我冇嘢o架！我覺得你唔鍾意我，咪唔好關注我囉！你又要睇我啲嘢！但又要踩我，呢一年見到好多真面目，最好嘅方法就係無視佢，根本呢啲人都Out of my list（喺我名單之外）。（EQ高？）不嬲EQ高，以前就好忍得，依家根本就唔理、唔Care。（得多過失？）我又覺得人哋眼裏嘅『失』，喺我眼裏係『得』，每個人有佢嘅人生，呢個係我蔡卓妍獨一無二嘅人生，唔係第二個人，只不過喺我一年裏面，發生咗幾年嘅嘢！」

找到Mr.Right

經歷了寶貴一課，問到是否對所有事也睇化？她說：「唔係睇化，係睇開，我仍然上緊堂，我好鍾意思考，每日都會諗今日發生乜事。」不少藝人近年潮興玩微博，阿Sa亦愛在微博Update近況：「好似寫緊一個日誌，偶然會睇番自己寫過嘅嘢，當係一個回顧，想關注我嘅人，已經喺晒度，變咗我可以用第一身同佢哋溝通，當然未必每人評論都回覆到，但起碼我真係全部都睇，無論好同唔好。」

男友William上月在勁爆頒獎禮當眾示愛，令阿Sa尷尬面紅，談到男友，阿Sa甜絲絲說：「好難避免唔談論，明白大家都要交功課，但我會避重就輕。（甜蜜期？）係嘅！（心目中Mr.Right？）暫時都幾好。」