李亞男妮妲莉春花放

農曆新年將至，女星紛紛將寓意花開富貴的花卉圖案及立體花剪裁着上身，但名模陳嘉容認為花碌碌配東方面孔最易出事，隨時散發娘味，而出爐金球影后妮妲莉可謂本周之花！

陳法蓉 8分

幾靚，好耐冇見佢呢種打扮，煥然一新。條裙好Sharp，個Pattern靚，佢夠白去Carry，好有夏日氣息，咁凍有呢啲嘢睇，覺得零舍醒神。

蔡卓妍 8分

着得好靚，成個感覺好得意，最吸引係髮型，有生果喺上面好突出，而條裙個立體花剪裁都夠特別，樣樣嘢都好配合。

徐子珊 ６分

不過不失，唔係好突出，反而肉色鞋令佢下身好似冇嘢咁，可以配合番裙嘅顏色，着對彩藍色或彩綠色嘅高踭鞋會突出啲。髮型OK，戴埋手鈪同耳環就靚晒。

鄺敏慧 ４分

條裙有啲窄，圓頭木踭鞋着得娘，髮型普通，寧願佢將頭髮放落嚟。着旗袍一係及膝同到腳眼，加對露趾高踭鞋；一係就潮啲着超迷你裙款，配對過膝長Boot。

李亞男 7.5分

唔明點解着旗袍一定係紮髻，好傳統，可唔可以有啲新意？依家好斯文，裙係靚，着條喱士Leggings配密頭鞋會特別啲，或者着及膝長Boot都可以。

安娜莫嘉莉 ９分

條喱士裙好靚，啡色唔啱中國人着，外國人夠白先Carry到，而且佢好適當咁配黑絲襪同黑Bra，已經好靚，冇咩要改善，或者可以加對小型吊墜耳環點綴吓。

妮妲莉寶文 ９分

喺電視睇已經覺得好靚，若果頭髮放落嚟會好啲，依家成熟咗。心口一朵大花夠晒，唔會娘，又唔係成條裙都係，加上一條簡單頸鏈，真係恰到好處。

諸葛梓岐 ６分

唔係個個着呢條裙都好睇，好彩佢身形好！裙係正常款，顏色OK，夠白着乜都好睇，但換對淺色露趾高踭鞋或抽踭鞋會潮啲。佢個樣可愛，可以着對有花邊嘅白襪仔配粉紅色密頭高踭鞋，襯番個形象。

陳嘉桓 5分

條裙個花好搶眼，應該換對鮮紅色高踭鞋襯番，而佢件衫個袖好Bulky，加上企領款，着到佢好似冇頸咁，應該見多啲頸，啱番個比例。

Marina V. 5分

應該着米色或肉色高踭鞋，成身冇特別，花花Pattern適合外國人着，冇問題，Set頭化妝都OK，只係覺得似聖誕多過農曆新年。

Profile

名模陳嘉容（Eunis）擁有多年行騷經驗，從而培養出敏銳的時裝觸覺，她早前主持時裝節目，以一針見血的手法品評城中名人的衣着，深受觀眾歡迎。

（最高10分）