張曼玉拖男友碎「分」訊
國際影星張曼玉（Maggie）與拍拖逾3年的德國籍建築師男友Ole Scheeren近日傳出「分」訊，昨晚二人十指緊扣到北京出席《時裝匯演》，拍照期間更不禁四目交投，十分甜蜜。Maggie否認為澄清情變傳聞而拖男友示人，更笑言二人經常拖手：「啲人話我分手，我咪話係囉！當全世界話係分手，得我話唔係就無謂啦！兩個人知道實際情況係點就得！」
Maggie又直言未有結婚計劃，笑言根本回應不了每日層出不窮的新聞：「我亦都唔需要回應，我哋唔Care！（見過雙方家長？）冇特別見過，之前有見過雙方父母，其實我好多朋友嘅家長都有見過！（會結婚？）咪係囉！一時話分手一時話結婚，自己知道就得，唔需要同人解釋，我依家幾開心！（話你為情消瘦？）我向來身形差不多，寫我分手就話我暴瘦，靚啲就話我結婚！」至於是否與周星馳合拍電影，Maggie只搖頭便離開。
攝：林楠北京傳真
Maggie與男友合照時，不時互望。
早前盛傳情變的Maggie，拖男友出席活動，十分恩愛。
心情靚爆的Maggie未有結婚計劃，坦言最重要現時開心。