佘詩曼跌跛手打石膏

佘詩曼日前在內地準備返港時,不慎跣倒跌甩手骹,本來返港要拍新劇的她,惟有「辭演」,無綫高層為臨陣物色女主角頂替而煩惱不已,首次與阿佘合作的黎耀祥大感可惜。

文:影視組

佘詩曼過往曾發生不少意外,先後曾撼親下巴及撞車,大前晚她於杭州返港時,不慎被地上的冰跣倒,左手手肘着地,引致甩骹,要即時入院打石膏,亦因此要辭演無綫劇集《法證先鋒III》。除受皮肉之苦外,她坦言最不開心是影響劇組。

記者昨日致電阿佘,她聲線微弱的表示已跟監製梅小青、高層曾勵珍及樂易玲通電話:「最唔開心係影響咗小青姐,令佢好麻煩,劇組已開廠,如果停廠等我會有困難,最後公司叫我休息養傷,今次係第一次拍祥仔,依家拍唔到真係可惜。」她又坦言開始發覺腳部麻痹,醫生檢查後指壓着神經線,手痛之餘,腰亦不可保持一個姿勢太久,故睡也睡不好,幸而其母在港可照顧她。

黎耀祥感可惜

至於監製梅小青昨日接受訪問時透露,正急於物色另一個既好戲又是一線花旦頂替:「依家我處理緊,影響梗係有,不過阿佘好有演員道德,佢都話怕我哋唔知點算。(有乜心水?)之前睇咗祥仔、徐子珊拍落嗰啲片,佢哋做得好好,都要搵個好戲、一線嘅演員。」她表示最重要是阿佘身體健康:「就算夾硬要佢開工,個骹都好易甩,拆石膏後佢都要做物理治療。」

本是首次與阿佘合作、劇中與她飾演一對的祥仔說:「估唔到第一次同佢合作就撻Q,係咪我剋親佢呢!(想換邊個做你另一半?)依家個個埋晒班,我都幾戥監製頭痛。」而與阿佘有不少對手戲的徐子珊表示,已聽聞對方受傷:「最緊要早日康復,我之前未同佢合作過,本來打算向佢偷吓師,真係好可惜!」

黎諾懿碌落樓梯

另一邊廂,黎諾懿日前在中環為此劇拍攝一場碌落樓梯的場面,由於地上有不少玻璃,碌了十多級後,其餘都要由替身上陣,問他是否靚樣緊要時,他打趣地說:「梗係啦!我哋啲冇演技梗係要靠個樣。」對於有份參演該劇的佘詩曼辭演,他說:「唔知喎!冇聽過。但係都會問候佢,希望佢身體冇事,快啲好番,可以盡快投入工作。」

佘詩曼日前在內地不慎跣倒跌甩手骹,受盡皮肉之苦。(資料圖片)

黎諾懿日前在中環拍攝碌落樓梯的戲份。

梅小青(左起)和佘詩曼等曾合作《公主嫁到》。