葉璇鋼鐵硬女性感歸位

金像獎女星葉璇為在電影上求突破，早已棄走性感路線，但最近她為內地一本雜誌影靚相，性感女神美譽再度歸位，絕對是「入得廚房，出得廳堂」。

身在橫店拍中央電視台劇集《鋼魂》的葉璇，坦言對「性感女神」一詞已覺陌生，更自爆有新花名：「性感女神個名我棄用好耐，依家已經有個新花名，就係叫『鋼魂』。」她解釋因當地天氣凍且下了好幾場雪，又要為《鋼》劇拍淋雨戲，當劇組擔心她會捱病時，葉璇卻硬淨撐過來，即被形容有如鋼鐵，風吹雨打都捱得住。

越南粉絲橫店追星

北上拍劇賺人民幣（人仔）之外，葉璇認為精神支撐亦很重要，她開心表示之前拍攝電視劇《國色天香》，當劇集全國播映後，其粉絲人數急升，其中更有越南粉絲特地到橫店探班，又為她開設了一個越南網站，葉璇說：「雖然我唔識睇越南文，但都好開心，好感動又覺得好溫暖。」

至於電影工作，葉璇亦作多方面賞試，較早前於電影內扮演「黃面婆」的她，不需要扮靚，純睇演技，努力擺脫花瓶形象的她，直指不同形象是要視乎角色而定。