Kelly人工受孕打孖上懷龍鳳胎

已育有一子「蝦餃仔」（劉昇）的Kelly，一直恨生女恨到出面，早前她還自爆渴望生個「兔女郎」！昨日Kelly出席活動時，開心地向傳媒公布喜訊，表示已懷孕約三個月，今次更是「起孖」，更大方公布是用人工受孕，她開心地說：「有咗！仲要係兩個，孖嘅！（三個月？）差唔多啦！總之夠日子就可以講，未知係仔定女！」據本報收到可靠消息，Kelly今次懷有「龍鳳胎」，令恨生女的她如願以償！

唔貪心有女就夠

性格坦率的Kelly不諱言今次是人工受孕，成為首位承認人工受孕的香港女星，年屆38歲的她解釋，因為不想40歲再度生BB：「心急咗，依家38歲，都驚BB危險，人工同天然都努力過，見唔係好得，所以醫生建議呢個方法，怕遲生體力唔夠好，風險大！我個人唔貪心，其中一個係女就得！」昨日以密實打扮亮相的Kelly，雖然佗孖B，但仍貫徹潮媽打扮，腳踏三吋長靴及穿長褸束腰帶，有型有款！

早前Kelly拍攝星皓電影《大鬧天宮》，片中飾演「觀音」，去年12月她在北京出席《大》片記者會時仍穿上高踭鞋，原來當時已得悉懷孖胎：「嗰時都係企喺度！（今日着高踭鞋？）三吋，矮咗o架！」問到會否擔心老公劉建浩收埋高踭鞋？她說：「唔怕，平日都係着波鞋，出席活動都係喺後台換啫！」

擔心巨B佗唔掂

Kelly直言「打孖上」是計劃之外，並坦承失了預算，但家人得知喜訊後亦開心到爆，問到老公反應如何？她表示老公今次只是「嚇一嚇」，問到老爺奶奶是否不用爭相湊BB？她笑說：「都好，減輕我負擔！」Kelly又表示蝦餃仔年幼，故暫未告知他將榮升哥哥。問到是否生完便「收爐」？Kelly卻衝口而出說：「生到出嚟先！唔係收爐，係封爐呀！」當她得知孖胎喜訊時，心情乍驚還喜，原來她驚「佗唔掂」：「今次驚啲，上次個肚已經好大，大到好似爆開咁，今次兩個都應該好巨，怕應付唔到！」