關楚耀賣抽提子嗌餐死

關楚耀早前到街市學做「生果佬」，平日對慣鏡頭的他叫賣時竟然怕醜，但最終克服尷尬，還愈叫愈落力，成功賣出一抽提子！

作為歌手每日總有同事安排一切，今次輪到關楚耀（Kelvin）落手落腳，嘗試體驗做生果檔小販滋味：「平日出席活動同歌迷、途人始終有距離，但街市就係廣大市民日日去嘅地方，感覺好親切！如果做街市小販，可以零距離同大家接觸。」

執貨身水身汗

日前，Kelvin與兩位歌迷便變身「生果佬」，穿上綠色圍裙後隨即開工！生果檔老闆沒有因他的歌手身份而優待，隨即叫他幫手搬車厘子，兩位小助手見偶像搬到滿頭大汗也上前幫手，不過被Kelvin婉拒：「唔使幫我，我要試吓自己搬！」搬到身水身汗後，Kelvin又要將生果執好：「呢次有少少技巧，因為睇吓有冇啲生果喺運送過程撞壞咗，好在呢次冇事，啲車厘子真係好靚！老闆仲話要不時同啲生果『濕吓身』，咁先可以保持新鮮！」

執完貨後，Kelvin開始幫手叫賣，平日滔滔不絕的他竟自言有點怕醜：「原來要大聲喺街市度叫，真係有啲尷尬。」幸好有途人認出兼讚他靚仔，令Kelvin信心大增愈叫愈落力，最後吸引男顧客幫襯買提子，令他非常興奮，更主動邀對方合照：「佢係我第一個客人，梗係要影相留念啦！」