白歆惠鍾嘉欣奪目雙紅

最近氣溫維持單位數字，但一班女星為了靚靚，堅持露肉露到底！鍾嘉欣化身桃紅中國娃娃拜早年，獲形象指導Ricky Kwok激讚！反之　模A. Lin錯着老土One Piece裙，驚嚇度十足！

白歆惠散發優雅氣派

郭：佢高挑身形駕馭到呢條紅色Cocktail Dress，好有優雅氣派，但對鞋同黑色絲襪顯得格格不入，改着黑色高踭鞋會順眼啲。

鍾嘉欣俏娃娃傳統美

郭：呢身桃紅色旗袍好有新年氣氛，好啱佢古銅膚色！加上佢本身身形夠高瘦，着得出中國傳統感覺，成個「中國娃娃」咁！

A. Lin娘爆加速老化

郭：呢條冇帶One Piece裙嘅Cutting麻麻哋，似伴娘Feel！襯黑鞋仲老土，梳埋個髮型老咗30年，驟眼睇以為係惠英紅！整體顯得佢四肢好粗，揀有袖或者加番對Leggings好啲！

徐淑敏古怪胸葫蘆身

郭：條裙騷到佢嘅葫蘆曲線，但胸前橫帶設計搞到胸線感覺古怪，肉酸咗！整體麻麻哋。

楊汀叮Overdone女人仔

郭：銀色Tube Dress款式平平無奇，閃令令質地感覺太成熟，髮型同化妝亦太過「女人仔」，加埋對黑色絲襪，Total Look Overdone！

張舒雅國產土氣佳麗

郭：雖然佢有高瘦骨架，但係太瘦「晾」唔起條裙，感覺闊騰騰，再加上金色化妝同埋朵娘娘「令」頭花，感覺好國產，冇貴氣！

Angelababy驟變老氣水桶

郭：條藍色Tube Dress映到佢好水桶身形，選擇貼身同收身剪裁會更Perfect，鑽飾亦都太貴氣同成熟，唔襯佢妹仔形象。

陳嘉桓黑金色「四正」樣

郭：條裙Cutting壓到佢個胸好平，雖然有啲娘娘哋，但黑金造型幾啱佢，成個Look「四正」OK！換對黑色露趾涼鞋會靚啲。