祖兒重奪女歌星破阿梅紀錄

今年樂壇頒獎禮是非多多，不過隨着昨晚舉行的《十大勁歌金曲頒獎典禮》圓滿結束，應可暫時告一段落！容祖兒狂掃4獎，更6度奪「最受歡迎女歌星」，打破梅艷芳紀錄！至於獲陳志雲力撐的古巨基，擊敗無綫親生仔林峯奪得「最受歡迎男歌星」，而英皇同門師弟林峯冧莊「亞太區最受歡迎香港男歌星」，英皇則擸11.5獎成為大贏家！

踏入《勁歌金曲》30周年，昨晚舉行的《十大勁歌金曲頒獎典禮》，為2010年度樂壇頒獎禮畫上句號，由於四大唱片與無綫關係仍膠着，故陳奕迅、李克勤、謝安琪及Mr.等統統無緣角逐，但獎項爭持仍非常激烈！最後祖兒狂掃4獎成大贏家，撼低千嬅6度榮登「最受歡迎女歌星」，除了打破個人紀錄外，更打破已故百變天后梅艷芳的「5后」紀錄，成為史上最強女歌手，4個頒獎禮上共奪14個獎！

祖兒再奪失落兩屆的「最受歡迎女歌星」，在台上坦言未想過再奪女歌星獎：「我其實真係冇諗再攞！今年感受特別深，因為人大咗感受唔同，我都係憑傻勁喺娛圈闖，多謝香港呢個土地眷顧我，今日睇尋日一定有做得唔好嘅地方，正如聽日睇今日都有唔夠好，我會不停努力進步，多謝支持！」

千嬅首奪亞太勁風騷

至於首奪「亞太區最受歡迎香港女歌星」的千嬅得悉獲獎後高呼：「嘩！勁呀！」更興奮連講3聲「多謝」：「真係好開心，絕唔係虛偽！今次呢兩個獎都冇拎過！我就嚟到37歲，唔好圈我啦！唔知出年仲有冇機會，我要多謝我老公令我成為丁太、令我成為『阿太區』最受歡迎女歌星！」共奪2.5個獎的她全晚相當風騷！

男歌手方面，無綫親生仔林峯雖然被傳有機會起雙飛奪兩個男歌星獎，不過終於不敵師兄基仔，幸仍有3獎在手！當他再奪「亞太區最受歡迎香港男歌星」時，宣布得獎的一刻，林峯驚訝搖頭，祖藍即抵死地說：「公司嘅努力真係有目共睹！」他不忘感謝撐到出面的無綫高層樂易玲：「1年前嘅今日我唔知應該講咩，1年後嘅今日都係好緊張，我唔係緊張冇獎，而係緊張攞獎之後唔知講乜！我要多謝屋企人，我一定一定每年都繼續努力！」

衞蘭JW奪金曲金獎

而3度榮獲「最受歡迎男歌星」的基仔，在台上多謝父母：「佢哋成日問我做嘢開唔開心？覺得我工作壓力好大，其實我睇到屋企人安樂就開心，雖然佢哋怕醜冇嚟，但係我想講只要你開心我就開心！」另外，JW及衞蘭憑《男人信什麼》奪得「金曲金獎」，相信老闆黎明全力催谷，實在功不可沒！

縱觀昨晚頒獎禮，無綫明益自己友，為電視劇《義海豪情》及《談情說案》唱主題曲的基仔及林峯亦入選「金曲獎」，而邵氏出品的電影《翡翠明珠》及《抱抱俏佳人》的主題曲原唱人祖兒、千嬅、阿Sa及林峯獲獎，至於曾為無綫効力的王梓軒、陳奐仁、MC Jin及姜文杰等歌手亦分到一杯羹，皆大歡喜！