GiGi攝位成功搶伊健先機

近期蜜運成功的梁詠琪（GiGi）昨日宣布將於下月底假紅館舉行演唱會，湊巧舊愛鄭伊健三月初開騷，攞威的GiGi可謂搶閘成功！

文：音樂組

梁詠琪昨日透過微博發放喜訊，承接上月平安夜在北京舉行演唱會的氣勢，她將於下月27至28日假紅館舉行兩場演唱會。事隔七年再踏紅館，GiGi於微博留言時難掩興奮心情，據知，該兩天的檔期原定是肥媽、陳潔靈及葉麗儀三人合作的演唱會，可惜三人的檔期未能配合，最終令GiGi成功插旗。巧合地，GiGi的舊愛伊健三月初開騷，GiGi今次搶閘成功，加上跟任職駐港美國領事館發言人的男友Matthew戀情浮面，這一仗贏得非常漂亮，她說：「唔好話搶頭啖湯，我攞到紅館個期都好驚喜，之前平安夜《北京G夜》演唱會反應好好，算係幫我打咗支強心針！（伊健接棒開騷？）我知佢開騷，希望大家都有好成績，大家都一齊Good Show啦！」

獲選微博受歡迎歌手

GiGi自爆平安夜當晚因失聲而影響演出，今次一定會戒口養聲，以最佳狀態示人，她說：「呢排天氣凍我都好少出街，新年可能都會留喺屋企，盡量戒口啦！（男友Matthew捧場？）每個好朋友都會支持，希望大家都鍾意啦！」另外，GiGi近日獲網友選為「微博最受歡迎女歌手」，其次是何韻詩及蔡卓妍，而「微博最受歡迎男歌手」的頭三位分別是周柏豪、黃宗澤及方大同。