超蓮火速覓新寵

回復單身的何超蓮，大前日與女友人到銅鑼灣行街，在嚴寒天氣下仍以短褲上陣騷長腿，吸引不少途人目光。

賭王何鴻燊三房幼女何超蓮，去年與拍拖約九個月的男友Jeremy分手，感情一直未有着落，不甘寂寞的她近日經常約朋友行街解悶。大前日下午3時半，戴頭巾的超蓮偕一名女友人在銅鑼灣閒逛，雖然天氣寒冷，但她卻穿短褲晒腿。

兩人先往影碟舖，逗留約10分鐘便轉身離開，步出時超蓮發現記者，即面露笑容，惟她表示沒有化妝，故急急戴上黑超遮掩素顏，才企定定拍照。由於超蓮一雙美腿極為養眼，沿途吸引不少男士行注目禮，但她未有理會，當途經至愛的珍珠奶茶店時，還拉着友人幫襯。

拍拖玩神秘

其後，超蓮在附近商場一間寵物店踎低揀倉鼠，她睇中一隻「新寵」，店員以紙袋為她包好。問到為何買倉鼠？超蓮說：「屋企嗰隻年紀太大死咗，所以依家再買。」至於現時有否拍拖？她即說：「冇呀！就算有又點會話你知呢？」然後便乘搭七人車到中環髮型屋Set頭，換上辮仔造型的她最後獨自乘車離開。