黎明話中有骨向商台宣戰

Amusic前晚拉隊杯葛《叱咤樂壇流行榜頒獎典禮》，抗議旗下歌手零獎，據知，Amusic決定向商台開火，不派歌上台兼不出席活動，揸弗人黎明說：「希望大家做好自己要做嘅事，唔好傷害到別人。」

由黎明揸弗的Amusic旗下歌手衞蘭（Janice）、李治廷和新人王JW，竟然在叱咤頒獎禮上全軍覆沒，由於以播放率定輸贏的賽果有數得計，故Amusic事先張揚缺席頒獎禮。據知，Amusic不滿Janice與JW的合唱歌《男人信什麼》零獎，JW還在「叱咤樂壇生力軍」輸給C AllStar、糖兄妹和林奕匡，相反，環球歌手卻狂擸10獎，由於環球高級副總裁黃劍濤是商台助理總經理甘菁菁的老公，難免惹來猜疑。

「唔好傷害到別人」

記者致電黎明了解，他說：「希望大家做好自己要做嘅事，唔好傷害到別人。」對傳言不多作回應，但似乎話裏有骨！而Amusic行政總裁王凱文則承認不會再跟商台合作，不會參與活動及不派歌上台：「因為大家方向唔同，商台只係睇關係，每個媒體有自己制度，公司冇權改變媒體嘅制度，既然派歌上去唔播或播得唔好，惟有選擇其他渠道宣傳。（杯葛有期限？）好難講，暫時睇目前。（黎明指令？）係公司政策。」他更透露公司不出席《十大中文金曲頒獎典禮》，因Amusic隸屬東亞旗下，故跟隨缺席。

此外，商台助理總經理甘菁菁前晚在叱咤慶功宴上，被追問Amusic杯葛一事，她承認有請所有上榜歌手出席，但Amusic回覆說歌手沒有空：「我哋唔會勉強。（唔開心？）其他唱片公司都唔齊人，可能我哋頒獎禮好易估賽果，佢哋預計到。（擔心明年有其他唱片公司咁做？）好難怕亦冇得怕，依家樂壇已經好混亂。」