周慧敏穩中求福

講起「玉女」，怎能不提周慧敏（Vivian）？今年入行25年的「玉女掌門人」，見證80後、90後、2000後的樂壇興衰變遷，不過Vivian卻沒有變過，依然是那把直長秀髮、那副標致面孔、那股清純氣質，她恍如服了「不老藥」般生活，找不到歲月的痕迹。唯一變的，是她的身份—由「玉女」升呢做「玉妻」。

要數圈中「玉女中的玉女」兼「防腐女星」，非周慧敏莫屬！一把直長秀髮、水汪汪的黑眼睛、清純不摻雜質，是Vivian獨有標記，難怪入行逾二十年，玉女寶座依然屹立不倒。隨後圈中不斷湧現「玉女」，包括楊采妮、梁詠琪和張栢芝等，亦曾被稱為「玉女掌門人」接班人，足見Vivian的「玉女」熱潮一代接一代！

談到這個稱號，Vivian說：「習慣咗Fans叫我做『掌門』，已經成為我成長一部分，亦知道呢個稱呼會跟足我一世，不過都係一個暱稱，觀眾評價一位藝人，主要係評價工作能力，名堂呢啲嘢冇乜所謂。」

Vivian的玉女形象根深柢固，不過原來玉女也有性感一面，當年Vivian在《感情的分禮》MV內的經典谷胸宮廷裝，驚為天人，突破玉女框框，至今仍令宅男津津樂道！談到性感定義，她說：「健康性感我會接受，刻意暴露就肯定唔會，但我都想畀大家多啲新鮮感。」

再踏紅館心態有別

將於今年3月中舉行25周年紀念演唱會的Vivian，相隔數年再踏紅館舞台，她直言不再像之前般辛苦自己：「今次同上次唔同，唔會參與太多製作，因為怕Handle唔到，所以會主力做好個人準備，好似早排影演唱會海報，我都係去到先知要着乜嘢衫，完全放手畀人搞，係一個Good Start！（跳舞？）點都會跳，會有Medley，但當然唔係好Powerful嗰種，因為唔適合我，會以輕巧舞姿為主。」

另外，Vivian擁有不少膾炙人口的金曲，包括《自作多情》、《天荒愛未老》、《感情的分禮》及《孤單的心痛》等，雖然曾獲歌曲獎項，但似乎與音樂大獎如女歌星獎「有緣無分」，惟她毫不介懷，還豁達地說：「喺自己能力範圍內做到最好，我會享受過程，唔會好執着名銜嘅嘢。」至於為今次個唱揀歌會否「頭痛」？她說：「咁又冇喎！因為啲Fans喺Forum揀咗好多Side Tracks，好多都係自己心水，我同佢哋心靈相通。」

在樂壇經歷了「四分一個世紀」的Vivian，早年曾淡出娛樂圈，當時她醉心畫畫、美式桌球，鮮有公開露面；另外，Vivian向來善心爆棚，多參與慈善活動，成為多個慈善團體的大使，亦助養了多名小朋友，加上她對寵物尤為熱愛，為了推動香港非牟利獸醫診所計劃，Vivian於06年「玉女回歸」，於紅館舉行三場演唱會籌款，反應熱烈。

Enjoy工作永不言休

談到現時工作心態，Vivian直言仍享受工作樂趣，她說：「起初入行，年輕人會追求滿足感，會有少少求勝心態，依家又係另一種心態，為興趣而工作，想輕鬆啲做嘢，而且我又唔係競爭，希望透過工作令自己不斷增值，最難得係咁多年都有唔錯嘅觀眾緣，老中青都留意到自己，係一種福氣。」

Vivian表示要與時並進，故未有退休打算，她說：「我依家唔算Full-time藝人，更加珍惜工作，暫時冇呢啲喎（指退休），而且我嘅人際關係好簡單。」

為心肝寶貝乜都得

若提及Vivian入行至今的最大考驗，相信是08年倪震在夜店與城大學生張茆激吻，導致Vivian發分手聲明，及後又離奇翻撻兼宣布結婚，峰迴路轉，兩口子經歷不少風雨，現時已經雨過天青，恩愛如昔，問到老公屆時會否上台給她驚喜？Vivian笑說：「應該唔會啩！」除了老公外，Vivian對心肝寶貝「周慧豹」疼愛有加，她還大爆「阿豹」趣事：「佢唔鍾意聽我唱歌，會好敏感，搞到我冇得喺屋企練歌，要去媽咪嗰度練。」