Carol叫娜姐前輩收峰認細

「浸大E神」楊梓瑤（Carol）及周秀娜（Chrissie），前晚齊齊封胸出席新片慶功宴，Carol更賣口乖自嘲是「小小後輩」，不欲性感搶前輩Chrissie「峰」頭！

羅仲謙、Carol、Chrissie、金剛、方皓玟、導演葉念琛及出品人王晶等前晚出席《婚前試愛》慶功宴，慶祝該片在港澳上映一周大收逾500萬元。對於被指在片中疑似「飛釘」，密實上陣的Carol坦言拍攝前已黐乳貼：「應該係幫我着衫嘅姐姐最有眼福！可能係燈光問題啫！（想唔想有續集拍？）都想！（要飛釘拍唔拍？）應該唔會！」愈說愈忟的Carol續說：「愛情片唔一定要講露幾多，唔好集中喺嗰度，對部戲唔公平！」她又直言片中的大露背已是性感底線，但不會因加入影壇後拒穿三點式。問到會否擔心Chrissie搶「峰」頭，Carol即大賣口乖：「佢係女主角，我係小小後輩，讓吓前輩冇所謂啦！」

自嘲「新牌仔」解圍

對於被Carol稱呼為「前輩」，與謙仔狂隊紅酒至面紅紅的Chrissie笑說：「我升呢得咁快？其實我有好多嘢未做到，都唔算成功！（前輩唔敢當？）我係『新牌仔』，考完未揸過車！」她又解釋因在台灣冒寒拍戲捱病，故密實上陣。

此外，王晶透露今年將在中港兩地開拍10部電影，其中《無價之寶》已落實由張栢芝演出，問到是否以高價利誘？他直言栢芝值得，更揚言自己是首位找栢芝拍戲的人。