Stephy梁漢文失靠山隨時冇碇企

金牌大風主席鄭東漢昨日發表公開信，稱已將公司全數賣盤，向來依附鄭中基的「太子黨」梁漢文及鄧麗欣等頓時群龍無首，更有傳黃柏高大有可能重新執政！

鄭東漢（Norman）昨日突然發出一封《金牌大風主席鄭東漢致各大傳媒及合作伙伴的信》，宣布將持有股份售予由龐維仁領導的太平洋資本投資亞洲有限公司，據知金牌大風為拓展大中華市場，不惜開水喉大灑金錢，可惜面對唱片及電影市場低迷，公司長期入不敷支，令入股的龐維仁大為不滿，決定搵黃柏高（Paco）幫忙救市，意興闌珊的Norman惟有忍痛賣股離場。

去年2月注資金牌大風的龐維仁，有傳入股後立即閂水喉，減人工及扣起雙糧，現時全權擁有金牌大風，公司上下難免人心惶惶！記者昨日致電龐維仁，問到是否想做娛樂大亨，他說：「唔好咁講，我哋生意人，睇好呢個Business，1月4號或5號會有記者會，到時先講。（有冇邊個想捧紅？）我冇乜點參與，我哋本身公司團隊會做，我會加強團隊，嚟緊有好多計劃，喺記者會會公布。」問到是否對鄭東漢的表現不滿，他說：「千祈唔好咁講，我哋關係好好，佢賣股份前都諗住退休。（搵Paco上位？）我要趕去派對。」說罷匆匆掛線。

「新仔」張繼聰矇查查

由於公司主席一職暫時懸空，早前與鄭中基鬧不和而被調往電影部的Paco，有傳大有機會重新執政，而向來以「太子爺」鄭中基為首的「太子黨」亦正式瓦解，包括梁漢文（Edmond）、鄧麗欣及方力申等。鄭中基昨日在內地主持倒數活動，至截稿前仍未回應，而Edmond則承認收到Norman來電：「據我所知，之後有段交接期，佢會留喺公司一段時間。（你啱啱續約？）我都有啲愕然，冇諗過會發生呢件事，有少少詫異！」他透露鄭中基早已知道消息，但被父親禁止放料，而他的唱片及演唱會計劃則暫時未受影響。另外，側田與鄧麗欣亦收到Norman來電，明白他希望多花時間陪家人而決定退休，並送上祝福。

相反，加盟不足3個月的張繼聰完全被漠視，記者昨午致電查詢時，他對事件毫不知情，更自嘲說：「可能我住得遠，啲風未吹到我嗰邊，加上我閂窗瞓覺！我只係低級職員，只係喺Party同Event見過兩位老闆！」

新主龐維仁諗大計

至於金牌大風CEO陳輝虹接受電話訪問時說：「退休啫！老闆嘅決定要接受，不過真係唔捨得。（跟埋走？）我有合約，仲有排！」他表示將正式與龐維仁開會，商討公司未來發展及方向，亦體諒歌手會擔心，問到Paco會否重返唱片部，他說：「你打電話問佢啦！（鄭生賺唔到錢唔玩？）唔係，賺幾多係商業秘密，賺錢方面OK啦！」

由Norman一手創立的金牌娛樂，08年8月以逾億元收購EMI大中華區的版權，正式改名「金牌大風」，旗下藝人包括羅志祥、張惠妹、鄧麗欣、RubberBand及周筆暢等。09年5月，經理人與音樂事務改由陳輝虹接掌，Paco開始失勢，而Paco黨的「靈魂人物」古巨基亦宣布不續約，轉投英皇娛樂發展。