施毛術有掂有唔掂 阿嬌變高Rain變肥

天氣轉冷，女星紛紛穿上冬裝保暖，毛毛系列成為她們的「飛佛」！阿Sa（蔡卓妍）與阿嬌（鍾欣桐）品味一致，冬裝打扮被讚「毛」得彈，不過李彩華（Rain）的戰衣卻予人「上身好肥」之感！

阿嬌 型到爆7分

評語︰「全身黑色打扮好型，望落唔核突，黑色毛毛褸設計好特別，效果前衞，厚身高踭鞋將阿嬌嘅視線拉長。不過戴一啲有顏色嘅飾物望落會冇咁悶，成個效果會唔同。另外，黑色絲襪換上灰色或深紫色，會更加搶眼。」

吳雨霏 野性美8分

評語︰「件豹紋外套好靚，好容易着得好女人，但佢嘅配搭好好，充滿女人味嘅外套佢着落潮味十足，加埋Leggings同高踭鞋，有一種型格同野性魅力，而上身色調合襯，灰色冷衫配淺色豹紋外套效果好舒服。」

湯怡 高瘦靚6分

評語︰「黑杏色配搭幾特別，杏色冇袖毛毛褸嘅設計好易着肥人，不過佢着上身就突出佢高瘦身段，同件褸好夾。黑色絲襪有潮味，唯一要改善可以戴一條黑色粗皮帶，凸顯個腰形，令成身線條更靚！」

阿Sa 勁Sharp9分

評語︰「毛毛褸好易着肥人，阿Sa嘅短身毛毛褸恰到好處，着得好瘦，全身黑色同粉紅色配搭，感覺新鮮又搶眼，粉紅色短裙加黑色絲襪，望落去好有生氣，好易成為焦點，好襯佢嘅風格。」

李彩華 着錯鞋4分

評語︰「Rain件褸嘅設計感覺着上身好肥，雖然佢身材高瘦，但效果唔係好好，最重要係錯誤配搭格仔靴，感覺成身好重，如果改着黑衫黑褲同貼身靴個比例會好啲，將個焦點由件褸擴展到全身。」

謝安琪 好臃腫5分

評語︰「其實佢嘅可塑性好高，但佢每次着衫都冇驚喜感覺，格仔褸嘅色調太普通，啡色超短褲加毛毛邊，完全冇星味，顯得個大腿好粗。黑色高踭長靴本身好靚，但襯埋一齊就好普通。」

連詩雅 唔見頸3分

評語︰「紅黑打扮本來好有節日氣氛，不過佢高瘦骨架襯呢身打扮平平無奇，刻意加毛毛領唔襯長髮，見唔到頸位令上身好臃腫，有失手感覺。如果紮起頭髮同改着緊身牛仔褲，加埋紅色高踭鞋，會更加好睇。」

陳靜儀 MK妹2分

評語︰「一身黑杏配搭加毛毛帽打扮好有MK Feel，尤其係毛毛帽九唔搭八，好似『阿婆帽』，戴咗好似老30年，而毛毛袖和領嘅大褸襯長髮，效果論盡。」

Profile

郭慶彬（Ricky Kwok）加入時裝界8年，以廣告形象指導為主要工作，曾任名模樂基兒和熊黛林的形象指導，並在銅鑼灣開設時裝店，主要售賣日本和英倫時裝。