艾美阿當絲演吧妹撕破純情面具

《魔法奇緣》荷里活女星艾美阿當絲於新片《The Fighter》中飾演酒吧女侍應，是拳擊手麥克華堡的女友，與以往純情形象有所不同。

記：記者　艾：艾美阿當絲

記：你經常以純情形象示人，但《The Fighter》飾演歷盡滄桑嘅酒吧女侍應，似乎有啲突破？

艾：有趣，我有啲朋友睇完《The Fighter》之後，同我講：「艾美，你終於喺電影度做番自己！」其實電影入面嘅角色唔似我，只係佢冇咁幼稚。我喺其他電影嘅角色未受過考驗，但呢個角色已經係個老江湖。

導演寄劇本斟合作

記：但好多人以為你真人係個純情玉女？

艾：我懷孕之後曾經接受過一個訪問，訪問我嘅人同我講，大家會對我曾經發生過性行為感到出奇。我當時唔知應該點回應，就話：「唔好意思，畀一分鐘時間我去接受你覺得我係性冷感嘅事實！」不過點都好，全世界以為你好天真好傻時，其實某程度上都係好事。雖然呢個唔係事實，但當我仲係20幾歲時，曾經活得好狂野。

記：可以傾吓你同《The Fighter》導演David O. Russell嘅合作？

艾：曾經同David傾過一部戲，不過最後未成事，之後佢為咗《The Fighter》聯絡我。當時我喺愛爾蘭拍緊《Leap Year》，佢寄咗20頁劇本畀我，當我差唔多讀到第20頁，突然諗到：「等等，我應該飾演呢個角色？」（笑）

期待BB出世

記：恭喜你懷孕，BB幾時出世？

艾：預產期係明年春天。

記：BB係男仔定女仔？

艾：我本來諗住等出世先揭曉，但我太冇耐性，所以我想知道。

記：幾時同未婚夫Darren Le Gallo結婚？

艾：我最近都好忙，其實我哋之前揀咗個日子，但因為工作關係必須延期。我當時需要打電話畀佢請求佢嘅同意：「我們需要將婚期押後！」所以，我依家終於有空閒，一定會好好計劃。