嘉玲血拚1粒鐘做Pink Santa

梁朝偉連月於內地拍戲，與劉嘉玲的造人計劃被迫停工，但早前嘉玲45歲生日，偉仔特地請假陪開P，得老公滋潤的她溫馨過後，日前風騷化身Pink Lady於名店瘋狂掃貨，相信是挑選聖誕禮物送給偉仔。

劉嘉玲與梁朝偉結婚兩年多來一直積極造人，雖然嘉玲開到口心急做媽咪，但堅持天然製造拒請代母，寧願與老公偉仔慢工出「正貨」。由於連月來偉仔於內地拍新片《一代宗師》，兩公婆分隔兩地無暇造人，不過早兩星期嘉玲45歲生日，愛妻心切的偉仔即向劇組請假，預先返港「復工」造人外，又買賀卡氹嘉玲，之後陪壽星女飛往上海，為她代理的時裝品牌剪綵，再聯同好友王菲、李冰冰等開生日派對，氹得嘉玲全晚勁High。

穿梭名店有斬獲

雖然共度生日後二人各有各忙，但得偉仔滋潤後，仍處於生日月的嘉玲明顯春風得意，日前現身中環時心情大靚。當日下午約三時，戴黑超的她Pink Lady上身，以粉紅色運動裝外套及長褲，配上藍色格仔恤衫，見她急急穿梭各大名店血拚，行逛約一小時已大有斬獲，購下數袋戰利品，店員還為她拿着一袋二袋步往附近乘車離開，嘉玲甫見記者拍照時，即笑笑口打招呼，問到是否買聖誕禮物給偉仔，嘉玲甜笑而不答，便登車離開。

風騷賀影星婚宴

事隔一日，嘉玲一身悉心打扮再出動，與數名友人到中環晚膳至深夜才離開，於店外更是任影唔嬲，問到造人計劃可有眉目時，她未有回答，但四萬咁口與記者揮手道別。另外，嘉玲昨日換上紅白靚裙出席內地演員周立波與富貴女友的婚禮，同場還有伊能靜、黃曉明及任賢齊等到賀。