千嬅嫁子高哭鬧咪Chok樣

恭喜！恭喜！去年在拉斯維加斯秘密註冊結婚的楊千嬅與丁子高，昨日在香港補擺喜酒，大笑姑婆千嬅施展一哭十鬧絕技，又喊又笑將老公治得貼貼服服，丁子高更在大庭廣眾公開另類愛的宣言，一對新人在笑與淚中共諧連理！

現年36歲的千嬅與比她年輕5年的丁子高昨日在君悅酒店筵開48席，現場布置以千嬅至愛的紫色為主，而仿賭城風格設計而成的名牌亦別具心思。雖然任職公關的新郎哥已發揮職業專長，從安排接新娘、向長輩斟茶及傳媒採訪等，時間拿捏得分毫不差，但千嬅與老公拖手出場給傳媒影相時，卻趁機大發嬌嗔，鬧了新郎不只十次。

千嬅施展一哭十鬧絕技：「今日證明咗我老公真係一個專業公關！由朝早到依家，我感覺好似去緊Event，佢係咁不停催、不停Briefing，對我嚟講，今日係一個遲來的春天，我初頭都以為唔會緊張，但卒之唔係，但我完全Enjoy唔到囉！我尋晚03（3時）瞓、要06（6時）起身，真係好攰囉！我依家有啲忟o架！頭先影相丁生又踩我件婚紗、隻手又鬼咁濕……」

承諾不在被竇放屁

丁子高見老婆玩「發脾四」，即連忙補鑊說：「我都係唔想傳媒等啫！（點氹番老婆？）我諗佢係忟我尋晚冇同佢瞓。」千嬅聞言即大喝：「衰人去死啦！Oh Sorry！我其實都好多謝佢送咗呢個婚禮畀我，我知道佢同班好似《生化危機》喪屍咁嘅兄弟拍咗段片喺婚宴播，今晚好多長輩，我怕佢哋三級，佢陣間講愛的宣言，唔該真心啲，唔好Chok樣！仲有，你快啲講承諾過我乜嘢！」丁子高聞言先呆一呆，然後才說：「我應承以後唔喺被竇放屁！（仲有乜愛的宣言？）我知千嬅話佢心目中今日係應該早啲來臨，之前係我就唔啱時間，千嬅，相信我，我會全心全意以後好好照顧你！」千嬅聽畢欲扮作若無其事，但雙眼已淚水汪汪，丁子高即遞上紙巾，她卻玩硬頸轉身避開：「拜拜！你睇吓你講完大家有乜反應？（做乜眼濕濕？）一講呢啲我就唔得，講真，我未識佢之前，真係唔相信、冇打算、唔期望會結婚，識佢最大得着係認識自己多咗，遇到啱嘅人，唔係期望對方喺物質上、地位上提供保護，而係令自己搵番自己，呢個係我結婚嘅原因。」丁子高聽罷即說：「我冇娶錯你！」語畢，兩人即相擁，場面感人。

冇老公陪緊張失眠

其實擺酒前一晚，千嬅緊張到睡不着，於凌晨2時許在微博留言：「仍眼光光，丁生不在身邊，又博到飛起！童鞋門，看到一些留言，需要澄清一下，明天我們的婚宴絕對沒有安排直播，只設有與傳媒祝酒環節，與大家分享喜悅。請諒！」連查小欣都忍不住叫她：「快睡！」千嬅即回應：「Yes madam！」此外，即使昨日擺酒，千嬅忙於招呼賓客，但仍iPhone不離手在微博回覆遠方好友的祝賀：「Love u guys！Thanks！」還不停呼籲大家要在叱咤頒獎禮投她一票：「斗零踭！我係我！」

「易發」婚宴菜單

珠聯囍璧合

露筍腰果炒螺片

水晶明蝦球

花膠北菇燉菜膽（位上）

翡翠蠔皇原隻湯鮑

清蒸海東星

蟹皇扒竹笙時蔬

脆皮龍崗雞

飄香荷葉飯

上湯鮮水餃

蓮子蛋白杏仁茶

合時鮮果盤

永結同心（香麻冬茸酥及香麻笑口棗）

中國茗茶

$28,000