曹蕙蘭愛犬當街撩人玩
港姐曹敏莉妹妹、正準備進軍樂壇的曹蕙蘭（Mable）（前名：曹敏寶），近日忙於錄製個人專輯：「雖然忙，但都唔可以唔理旺旺，因為佢仲細，好需要照顧。」旺旺是其史納莎愛犬，她說：「佢只有一歲幾，所以好多嘢都未學，依家開始教佢自己去廁所。」Mable自言一家都是愛狗之人，剛新婚的二家姐曹敏莉養了兩隻狗，因與家姐住得近，平日都會一起帶狗仔落街散步：「旺旺每次出去都好興奮，見到唔識嘅人都會走埋去撩人玩，好鬼熱情！」
Mable坦言旺旺最愛跟她，去廁所亦想跟着去：「旺旺以前跟我同大家姐一齊住，但大家姐最近生咗BB，所以冇時間照顧佢，呢個重任就交咗畀我，所以佢依家當正我係佢媽媽。」她透露旺旺平日常在家中四處跑，非常百厭：「有時有朋友嚟屋企，佢會好熱情咁撲去人哋度，好彩我啲朋友都好鍾意小動物，唔會畀佢嚇親。」
Mable表示愛犬經常跟蹤她去廁所。
Mable對愛犬照顧得無微不至。
