G.E.M.追尋缺陷情人

G.E.M.追尋缺陷情人

鄧紫棋(G.E.M.)年前憑「小巨肺」、「金魚嘴」及「禾稈冚珍珠的身材」火速彈起,帶點Baby Fat的小妹妹逐步搣走脂肪,成為今日的型格Rock女。她接受訪問時無所不談,唯獨對感情事怕醜避忌,只表示追尋不完美的情人。

感情‧封口

每次談及緋聞男友林宥嘉,G.E.M.便會築起圍牆,對感情事的防衞意識極強:「感情嘢留畀自己,總之開心就得,依家處於每個方面都幾開心嘅狀態,工作呀!做運動呀!(包括感情?)我同屋企人感情幾好呀!」她堅持要留待結婚才公開真命天子,原來是怕男友不是一生一世的對象:「因為由拍拖要去到結婚嗰個,唔知係唔係一世一生嘅人,講咗出嚟大家又唔會理我音樂嘢!我希望大家留意工作方面多啲。(唔公開唔怕被指講大話?)怕呀!所以我會直接話唔講,好過話冇!」問到她是否接受婚前性行為?她尷尬地說:「唔講啦!」

她不談緋聞,但從她的愛情觀卻發現她有點人細鬼大。問到何謂真愛?她說:「為錢就唔係真正嘅愛,真正嘅愛係選擇唔完美嘅人,如果對方係唔完美,你仲愛佢愛到想結婚先至係愛。自己有能力買樓,點解要另一半去買呢?唔係用對方有幾多錢、幾多樓去考慮,我覺得愛大過呢啲!接受到唔完美就係搵到啱嘅人。(唔完美定義?)就係價值觀唔同,想法唔同,實質啲講,大家可能日日為一件小事而拗撬,真係鍾意就會調節自己個思想去遷就佢,喺細微嘅事上改變,就係真心愛一個人。」

外形‧突破

G.E.M.早前化身「豆丁GaGa」拍攝MV,Rock味滿瀉,連她亦想不到自己可以駕馭這些造型。談到為何銳意走型女路線?她笑說:「要襯番我個樣,就要唱兒歌啦!哈哈!我想身形Firm啲!而且細個成日聽西方音樂而受影響,加上可能係西方監製嘅關係,我好鍾意R&B。」問到是否想成為「港版GaGa」?她耍手擰頭地表示不及對方藝高人膽大:「唔想似Lady GaGa,音樂類型都唔同,佢個風格間唔中一兩首就OK,全隻碟都係就唔得,我唔係咁into呢種音樂,而佢個形象咁前衞大膽,我唔係唔想踏出第一步,但做唔到佢咁,佢個膽真係好大,好突破,而我冇咁大膽去試咁多唔同形象,我大膽在肯試唔同嘅音樂。」

吵鬧‧珍惜

在求學時期,G.E.M.與家人吵吵鬧鬧,工作後家庭關係卻出現轉機,與爸爸成功「破冰」:「放佢哋喺第一位,不過有時唔可以成日返屋企食飯,如果係愛嘅又唔一定真係要做到,好有心就可以,一星期返到屋企食飯一日都好好。依家比起返學讀書嗰時,愈嚟愈重視屋企人,以前同同學出街玩、傾電話,媽咪會嘈我,依家就冇。以前同爹哋關係唔多好,正常講嘢唔多過五分鐘,一講就嘈交,好似我玩電腦唔肯熄機,佢就會嘈,但依家少咗見面就冇嘈。我出咗嚟做嘢,爹哋退咗休,喺屋企打點一切,煮飯、做家務,發覺佢付出好多,我少咗返屋企,佢會煲定湯畀我,真係覺得要好好珍惜。(擔家壓力大?)冇乜。」

慳錢‧養家

蝸居是香港人面對的重大問題,G.E.M.亦坦言慳錢的目標是買樓,但並非想進駐豪宅,只嚮往一家人生活。她說:「我對豪宅冇概念,希望搬屋有多間房可以做衣帽間,唔知咩係千萬豪宅,幾多呎係呃人o架!試過去朋友千幾呎嘅屋企,但望落細到死,實用面積呃人嘅!去另一個朋友屋企,以為間屋好大,點知一問發現原來係700呎,好睇你點設計。我想空間大啲!實用率高同好舒服,同屋企人一齊住。(婚後要小天地?)結咗婚希望同屋企人住附近,如果買到大屋就一齊住。」密密工作的她應該收入可觀,問到是否已儲到首期?她說:「依家首期要幾多呀?(大概100萬。)嗯,都差唔多。(買車?)唔想買車,唔考車牌,香港泊車好難,成日周圍都停唔到車,唔想泊車喺一個地方,要落車再行好遠先到目的地。」

蛻變

G.E.M.現在愈來愈Fit,造型愈來愈Rock,昔日清純的打扮及帶點Baby Fat的身形已不復再。

1.罕露「事業線」

初出道時走清純路線,以短裙、熱褲及極具女人味的露趾高踭鞋示人,又罕有地穿上Tube Top及超短裙,露出少許「事業線」,可算是最性感一次。

2.間中失守

早前出席活動時竟冇拉褲鏈,她笑說:「最衰都係我助手,佢平日跟開我,點知嗰日放假,冇人提我就出事喇。」

3.豆丁GaGa  

為拍攝新歌《One Button》而邀設計師為她度身訂造至新造型,她一改乖乖女形象,以Rock爆的雞冠頭及黑色皮衣示人,化身「豆丁版Lady GaGa」。

聖誕節買咩禮物好?
即上on.cc東方互動《享樂聖誕2010》專輯,為您一站式搜羅各類聖誕消費情報!

林嘉慈

雖然不願講感情事,但看得出G.E.M.愛情觀別具一格。

G.E.M.與父親「破冰」,並學懂珍惜親情。

初出道的G.E.M.穿高踭鞋、露事業線。(資料圖片)

為了作出突破,G.E.M.化身「豆丁GaGa」。(資料圖片)

G.E.M.出席活動時忘記拉褲鏈,認真「大頭蝦」。(資料圖片)