Wonder Girls 11℃低溫唱慶博覽館

Wonder Girls 11℃低溫唱慶博覽館

韓國人氣女子組合Wonder Girls昨晚首度於香港開騷,於11℃低溫下又跳又唱,以勁歌熱舞為現場升溫,兼講廣東話冧Fans,難怪全場爆滿,更吸引陳靜及懷孕四個月的黃婉佩抵冷捧場!

韓國組合Wonder Girls昨晚在香港機場亞洲國際博覽館舉行演唱會,憑一首《Nobody》紅透半邊天的五位成員,成功吸引Fans捧場,座無虛席,甫開騷WG以黑色裝亮相,藝恩、友彬、善藝及惠林均「騷小小」以低胸裝登場,除了日前才染上金髮來港的藝恩「施髮術」成功搶鏡外,惠林則獨自熱褲上陣大晒長腿,養眼度飆升。五人首先以代表作熱身,接連唱出《So Hot》及《I Wanna》勁歌加熱舞,不斷扭動纖腰,立即令低溫下的機場熱情上升。五人更是有備而來,以廣東話大嗌:「大家好!」冧得港迷興奮尖叫。

Rosanne畀BB聽快歌

昨晚赤鱲角機場徘回於11℃左右,但WG魅力沒法擋,一眾港星甘冒冷風前往機場睇騷,包括懷孕四個月的2R成員Rosanne(黃婉佩),她在妹妹Race陪同下,腹大便便到場,並說:「預產期喺明年六月。(驚唔驚現場強勁音樂會影響BB?)唔緊要,我坐第一行添!BB聽多啲音樂會有節拍感,睇睇吓可能仲會跳舞添!」而這位潮媽除了聽歌睇騷,還透露近日有游泳。問到腹中BB性別時,她則大賣關子:「未知!仲未照,但我媽咪希望係仔。」

另外,陳靜(DaDa)與經理人施念慈及同門Liz(原名李莉琳,現改名李宥彤)一同捧場,陳靜說:「之前拍劇學過跳Wonder Girls首《Nobody》,所以今次專登嚟捧場。」她又自爆近日碌落樓梯扭傷左腳:「唔係好嚴重,但暫時要着平底鞋。」

影視組

在港出生的惠林,來到半個鄉下的香港開騷,演出格外落力。

Wonder Girls載歌載舞,將博覽館氣溫提升。

Wonder Girls開騷,獻唱《Nobody》當然是指定動作。

寒流持續,幸無損一班Fans捧WG場的熱情。