Kary放低悲傷發力唱
吳雨霏（Kary）早前大方公開與拍拖多年的圈外男友洪立熙分手，情場失意的她坦言要放下一切悲傷，集中火力為下月的紅館演唱會作好準備。
將於下月30日假紅館開騷的Kary，正加緊綵排個唱，日前她突然宣布與「網球王子」男友洪立熙分手，向來與男友感情穩定的她，突然分手令人大感可惜，問到會否邀對方睇騷？Kary大方地說：「冇所謂！（再見亦是朋友？）始終佢唔係圈中人，唔想講太多。」
Kary坦言甩拖一定會傷心，但不想因感情問題影響工作，她說：「一直以嚟感情同工作都分得好開，依家乜都唔理住，大前提係做好個騷，其他嘢容後再談！（集中到精神？）暫時仲可以，只要有工作做就冇時間諗。」問到是否相信緣分？Kary說：「信o架！要發生就會自己發生。」
性感演出回饋歌迷
Kary表示為給歌迷帶來新鮮感，個唱會有性感演出，並賣關子說：「唔一定係衣服上，可能係動作同視覺效果！」曾在Star Hall舉行處女個唱的她說：「有咗上次經驗，今次會做得更好。當然想加開，能夠喺紅館開騷已經好開心！」
為了報答歌迷支持，Kary將會在個唱中有性感演出。
感情失意的Kary，現寄情工作，加緊籌備紅館個唱。
Kary回眸一笑，認真嬌俏。
Kary早前高調宣布與男友分手。（資料圖片）