溫拿30呎魚網逗利是

溫拿為慶祝組隊38周年，於農曆新年在紅館聚首開騷，譚詠麟笑言要預備一個30呎金色魚網，讓他漁翁撒網逗利是。

溫拿五虎明年2月農曆新年檔期假紅館開騷，與觀眾共度兔年，阿倫哈哈笑說：「逗利是啦！但今年開三面台以Band Sound為主，逗利是難啲，好在健仔諗咗好方法，佢話用魚網伸出去接利是。」愛釣魚的健仔以專家口脗說：「依家啲魚網好長，有20幾呎。」阿倫聞言心花怒放說：「唔係啩？咁要買定一支畀我，噴晒金色，哈哈！」

為了今次個唱，溫拿籌備逾半年，並一早已想好扮紅衞兵Look拍海報宣傳，怎知卻撞橋，阿倫說：「睇報紙見到小春結婚又係整呢啲妝，我哋當其時都呆一呆，諗咗半年嘅橋畀人用咗，但張國忠（藝能娛樂老闆）話唔緊要，我哋五個出嚟另一個感覺，帶畀人開心。」

大唱法語歌

結果溫拿照原訂計劃籌備開騷，今次還玩突破，阿倫和鍾鎮濤唱多國語言的金曲，跳舞環節則交給陳友、健仔和阿強，阿倫說：「溫拿係樂壇圖書館，演唱會會唱由70年代至千禧年代嘅唔同國家Hit歌，有俄語、法語同韓語。」問到是否要咪嘴？阿倫得戚地說：「使乜咪嘴，記咪得囉！我都出過韓文碟。」而負責跳舞的健

仔就說：「我哋認真去排練，愈認真跳啲人愈開心，務求畫面

好睇。」