曹蕙蘭韓風舞女搶閘掀聖戰

港姐冠軍曹敏莉妹妹曹蕙蘭（Mable），向來對音樂充滿興趣，作為樂壇生力軍的她，早前邀得兩大音樂才子陳奐仁及周禮茂打造新歌，並銳意效法偶像李孝利，化身「韓風」Dancing Queen！

雖然家姐曹敏莉是港姐冠軍，但Mable對選美及拍劇興趣不大，反而專心發展音樂事業，新歌《Auld Lang Syne》更邀得音樂才子陳奐仁監製及作曲，並由周禮茂填詞。原本打算明年才正式出道的她，因新歌充滿節日氣氛而搶閘推出：「本來公司諗住冇咁早派歌，但首歌真係講緊倒數嘅狂歡氣氛，所以決定提早派上台，So far電台啲DJ見到我呢位超齡新人都鍾意我呢首歌！」

樂壇新人輩出，Mable決定以韓國型女風突圍而出，目前除了勤力練歌外，還要每周到舞蹈室學跳舞：「其實我一直好鍾意韓國歌手李孝利，係超級Fans，佢一出道我已經好鍾意佢，所以都想學佢嘅風格，希望練得一身好『舞功』啦！」她又希望獲公司安排到韓國拜師學藝：「好想去韓國學跳舞，參考吓佢哋嘅風格。」

壓力爆煲頻失眠

作為新人壓力自然大，Mable自爆最近經常失眠，幸獲家人支持鼓勵：「因為呢排忙錄歌同搞新唱片封面，加埋本身嘅壓力，真係成日瞓唔到！（家姐有冇鼓勵？）有！屋企人都好好，尤其係媽咪，日日煲愛心湯水畀我飲！」