林保怡再奪殊榮「Nobody」贈興
升格「亞洲視帝」的林保怡，昨日宣布再獲內地網上人氣男演員獎，更懶理無綫何時慶功，只顧與薛家燕跳《Nobody》賀一賀。
薛家燕、林保怡及鍾嘉欣等昨日為無綫新劇《九江意醲》試造型，家燕姐為賀保怡榮膺「亞洲視帝」，即席表演以十字步跳《Nobody》，氹得保怡開心得落場跳番Part，她介紹演員時又大賣口乖：「畀視帝講吓，我怕話無綫忽略咗你！」
爆高層探口風
至於保怡則透露因接二連三得獎而未能趕及剃頭試造型：「本來想今日剃，但啱啱知道喺內地攞咗個『網上人氣男演員獎』，月底要去北京領獎！（公司有咩表示？）頭先撞到高層，佢問我係咪嬲公司？我唔係嬲！同無綫合作咁耐，未來一定同佢合作！可能佢哋多嘢做啦！話下個月會有慶祝活動！（高層係咪樂易玲？）哈哈！總之我唔會畀勝利沖昏頭腦，唔會驕傲！」
對於無綫冷待保怡，家燕姐亦指公司不是：「咁又真係唔係咁好！佢又唔通知我，等我拉大隊去機場跳《Nobody》嘛！」而在劇中與陳錦鴻演一對的鍾嘉欣透露，角色有長短腳缺陷，故擔心長期拍攝會影響盆骨。
遭冷待的保怡與家燕姐大跳《Nobody》自娛，唏噓得嚟又幾搞笑！
獲家燕姐獻吻祝賀的保怡，高興得現「動L腳」。
雖然陳錦鴻被嘲「花灑視帝」，但嘉欣力撐對方說話有道理及內涵。