傅穎轟羅仲謙冇句真

歌手傅穎（Theresa）昨日到電台宣傳，自爆跟緋聞男友羅仲謙的關係由朋友降呢為同事，當提到謙仔稱從未追求她時，Theresa立即黑面說：「所以咪話佢講嘢冇句真囉！」

今日推出全新EP的Theresa昨日接受電台訪問，原本心情大靚的她提到跟謙仔反目時，她立即黑面嬲爆爆，不欲多談對方，她說：「之前一直都係同事同埋朋友，但係一段關係冇咗誠信，就惟有　退一步做番同事。（欺騙感情？）其他嘢唔想講太多，嗰日我係衝動咗少少，但我話佢講嘢冇句真係啱！（佢會唔會唔知咩事？）佢肯定知發生咩事！」

Theresa坦言將來同場工作都不會尷尬，絕不影響工作，再被追問是否牽涉感情瓜葛？她說：「我係單身呀！（曾經發展？）我係單身呀！（佢話冇追過你喎！）所以我咪話佢講嘢冇句真囉！」似乎間接承認謙仔曾向她展開追求。

出碟賣大包

另外，Theresa備受聲沙困擾四個月，EP歌曲由原本四首改為三首，為補償歌迷，她準備近1,100份限量版禮物，包括她繪畫的月曆、B.Duck公仔及手錶，她說：「之前聲沙搞到四首歌變三首歌，有少少遺憾，希望當送聖誕禮物畀大家補償！」至於捲入「感情糾紛」的羅仲謙，至昨晚截稿前仍未回覆。