周秀娜以情變威脅男友

周秀娜由o靚模升呢為藝人，電影一套接一套，連聖誕的黃金檔期也要在台灣拍戲度過，損失六位數字收入，認真冇陰功！

周秀娜、劉心悠、房祖名、蘇永康及名模Ana R.等，昨日出席《she critiques美容大賞2010》頒獎典禮活動。娜姐被身穿低胸裙的心悠搶風頭，但娜姐笑言身穿的喱士裙子十分Hot。她透露聖誕要到台灣拍戲，問到在黃金檔期是否損失不少？她說：「係呀！接少咗幾個Job，損失6位數字收入。（同男友感情亮紅燈？）依家衝咗線變綠燈，但如果佢聖誕唔嚟陪我，就變紅燈！」

心悠「畫」事業線

至於劉心悠謙稱身上的事業線是畫出來，並笑言長了肉。提到同公司的傅穎與緋聞男友羅仲謙反面，更指男方說謊？心悠力撐師弟：「阿謙係好純情嘅男仔，佢唔鍾意講大話，起碼佢對我冇講過大話，佢幾年前話送件褸畀我，點知真係送咗，所以覺得佢唔會講大話。（擔心佢被情場老手欺騙？）唔驚，除非嗰個人都係抱住玩人嘅心態，否則都唔使驚。」而遲大到的房祖名則透露剛從北京拍戲返港，聖誕會在台灣度過，問到會否送聖誕禮物給「女友」薛凱琪？他說：「會送圍巾，等佢圍住條頸。（因為佢頸長？）因為佢好怕凍。」