祖兒傳宗接代靠晒細佬

容祖兒昨日出席慈善活動，突然表示懷疑自己不會生小孩，並將傳宗接代重任交給細佬，但否認與傳出「斷背」有關：「就算呢種戀愛都可以生，純粹另一個意願。」

容祖兒（Joey）昨日與2R及蔡穎恩（Evelyn）等現身海港城，出席《ANTEPRIMA X MY MELODY & KUROMI》慈善活動，早前各女星將她們拿着該品牌靚袋相上載接受投票，最後Joey以大比數勝出，ANTEPRIMA以其名義捐出10萬元善款，Joey說：「我揀咗護苗基金作為受惠機構，入面保護小朋友，同埋懷疑自己會唔會生小朋友。」

Rosanne恨生女

由於Joey不避嫌戴着與密友何韻詩的疑似情侶戒指及手鏈，問到為何表示「唔生小朋友」？她說：「唉！唔知呀！依家生同養唔係問題，教先麻煩，自己喺單親家庭長大，好彩冇行歪，身邊朋友都有小朋友，佢哋教責任冇咁大，都享受o架！」Joey不怕此言論惹斷背傳聞：「唔關事，就算呢種戀愛都可以生，純粹另一個意願。」她更笑言曾向細佬逼婚，催促他與拍拖七年的女友拉埋天窗，酒席費用全包在她身上。此外，穿泰山裝的Joey竟上下失守，上露胸墊下露打底褲，她說：「我瘦咗好多，已經盡力用個胳肋底夾住，但都係走咗少少出嚟。」

至於腹大便便的2R家姐黃婉君（Rosanne）腳踏3吋高踭鞋，全程由妹妹黃婉佩（Race）陪伴，Rosanne未有回答胎兒性別，但Race則指着Rosanne手中的Melody公仔說：「好似佢咁。」Rosanne表示與老公都想生女，但媽咪想抱男孫：「生女都幾可愛吖！未照呀！」